Татарстан бакчаларында кабат ясле төркемнәре эшли башлый

Фото: Ринат Нәҗметдинов

Билгеле булганча, Татарстанда 3 яшькәчә сабыйлар өчен балалар бакчалары юк диярлек. Тик быел исә барысы да тамырдан үзгәрәчәк. Республикада хатын-кызлар соравы буенча, 3 яшькәчә балаларны бакча белән тәэмин итү буенча махсус программа тормышка ашырыла башлаган.

Бу турыда Татарстан Дәүләт Советында узган җәмәгать тыңлаулары вакытында Татарстанның мәгариф һәм фән министры урынбасары Азат Шәрәпов сөйләде.

— Быел өч яшькә кадәрге балалар өчен садикларда 2 меңнән артык урын булдырылачак, — дип ассызыклады ул.

Бу максатка барлыгы 5 миллиард сум акча бүлеп бирелгән. 2019 елның башында милли программа кысаларында төзелгән 2 бакча үз эшен башлап җибәргән инде.  Алдагы ярты елда Казанда – 10, Чаллыда – 6, Әлмәт һәм Түбән Камада – 2 шәр, Алабуга, Азнакай, Минзәләдә, Лаеш, Кайбыч, Нурлат һәм Питрәч районнарында — 1шәр бакча ачылачак.

2021 елга исә балалар бакчаларында урыннар белән 1,5-6 яшьлек 15 мең (!) бала тәэмин ителергә тиеш.

Почтальоннарга – акчалата бүләк!

Мәгълүм булганча, 1нче апрельдә 2019 елның икенче яртыеллыгына язылу кампаниясе башланып китте. Ә бүген исә узган яртыеелык нәтиҗәләре буенча «Хат ташучылар һәм почта элемтәсе бүлекчәләре бәйгесе»нең җиңүчеләрен котладылар. Бүләкләү тантанасы «Татмедиа» акционерлык җәмгыяте матбугат залында узды. Бәйгедә җиңүчеләр «Татмедиа» ширкәте генераль директоры Андрей Кузьмин кулыннан акчалата призлар белән бүләкләнде.

«Тараткан контентыгыз өчен сезгә оят булмаска тиеш. Чөнки аны районнарыбыз өчен җаны-тәне белән көеп яшәгән журналистларыбыз яза — фактларны бозмыйча, матур һәм дөрес телдә язучы коллегаларыбыз», – диде Андрей Кузьмин.

«Безгә ничә тапкыр интернет басмалары «Сез үлдегез, сезне укымаячаклар!» дип әйтсәләр дә, безнең эшебез барыбер дәвам итә, чөнки сез тараткан контент — ул гадел профессиональ һәм төгәл итеп языла», – диде ул.

Республикакүләм бәйге дүрт номинациядә узды. «Иң яхшы авыл почтальоны» номинациясендә Актаныш районыннан Нурия Басыйрова, Балтачтан Екатерина Зәйнуллина һәм Чирмешәннән Нурсинә Җиһаншина җиңде. Кече шәһәрнең иң яхшы хат ташучысы итеп Мамадыштан Нурия Шәкүрова һәм Чистайдан Надежда Кольцова билгеләнде. Аларның һәрберсе 15 мең сум күләмендәге акчалата приз белән бүләкләнде.

Иң яхшы почта элемтәсе бүлекчәләре итеп Югары Ослан районының – Октябрьскский (422580), Актаныштагы  – Яңа Әлем (423762), Мамадышның (422192), Балтач районындагы – Урта Көшкәт (422241) һәм Чирмешәндәге – Яңа Элмәле бүлекчәләре (423118) игълан ителде. Аларның һәрберсенә 30 мең сум акча тапшырылды.

 

tatar-inform.tatar

Салават Фәтхетдинов призларына көрәш ярышы (ИСЕМЛЕК, ФОТО)

Бүген Теләчедә 4 нче тапкыр Татарстанның халык, Россия һәм Башкортстанның атказанган артисты Салават Фәтхетдинов призларына балалар арасында көрәш ярышы узды. 315 көрәшче һәм 34 команда катнашкан чарадан язма әзерләнә. Әлегә фоторепортаж карагыз һәм җиңүчеләр белән таныша торыгыз:

 

 

Илназ Мөхәрләмов фотолары

Татарстанда 22 мартта бала хокукы буенча кайнар линия эшләячәк

Татарстанда 22 мартта баланың гаиләгә хокукларын гамәлгә ашыру һәм гаилә элемтәләре өлкәсендә гражданнарга консультатив ярдәм күрсәтү буенча кайнар линия оештырылачак. Бу хакта Татарстанда Бала хокуклары буенча вәкилнең рәсми сайтында хәбәр ителә.

Республикада яшәүчеләр гаиләдәге имин булмаган вазгыять һәм аны кисәтү, шулай ук ятимнәр һәм ата-ана җылысыннан мәхрүм балаларның хокукларын үтәүгә бәйле сорауларны 8 (843) 236-61-24; 236-61-26; 236-61-49 телефоннары буенча шалтыратып бирә алачак.

Гражданнарга Татарстанда Бала хокуклары буенча вәкил Аппараты, ТР Мәгариф һәм фән министрлыгы, Балигъ булмаганнар эшләре һәм аларның хокукларын яклау буенча республика комиссиясе вәкилләре үз киңәшләрен бирәчәк. Кайнар линия иртәнге 9дан көндезге 4кә кадәр эшләячәк.

//tatar-inform.tatar//

Балалар өчен Мөҗәһит Әхмәтҗанов шигырьләре

***

Минем бабай белән әби

Кояшны уздыралар:

Кояштан соң яталар да

Таң атканчы торалар.


Әби шатлыгы

Оныклар кайткан авылга,

Әбиләре янына.

Чөнки аларны  “Абейка”

Бигрәкләр дә сагына.

 

Әбисе белән оныклар

Сөйләшеп һич туймыйлар.

Тәртисез түгел үзләре

Әбиләрен тыңлыйлар.

 

Әби дә мактап туялмый:

“Мине бик санлыйлар, — ди.

-Татарча белмәсәләр дә,

Барысын аңлыйлар”, — ди.


Матурлык

 

Матурлыкны күрәм дә мин,

Күз дә салам аңарга.

Ничек ул матур булган соң,

Тырышамын аңларга.

 

Матурлык ул табигатьтә,

Матур була кеше дә.

Матур була ала икән

Шул кешенең эше дә.

 

Әтиемнән сорадым мин

Матурлыкның серләрен.

Шунда әти ачып салды

Үзенең тәэсирләрен.

 

— Матурлыкны күрә белгәч,

Син буш түгел, кызым, — ди.

— Аңа ирешү юллары

Кыска түгел, озын, — ди.

 

— Алла боерса синнән дә

Матурлык туачак, — ди.

— Кешеләр синең эшеңә

Сокланып узачак, — ди.


Җәй кадере авылда

Йомырканы кетәелектән

Кереп кенә алабыз.

Абзардагы кәҗәбезне

Көнгә ике савабыз.

 

Яшелчә, җиләк-җимешләр –

Бар да үсә бакчада.

Балны да сатып алган юк

Кибетләрдән акчага…

 

Бал кортлары бал җыйганда,

Миндә бераз хәл җыям.

Табигать биргән байлыкны

Җәйдән әзерләп куям.

 

Сандугач, тургай моңнары,

Ул күке тавышлары…

Җәен олы бүләк алар,

Ишетелми кышларын.

 

Җәйнең кадере авылда,

Белегез һәрберегез.

Ышанмасагыз үзегез

Безгә килеп күрегез.


***

Чәчкәләр белән үләннәр

Балаларны күргәннәр.

“Бездә байлык, бездә муллык,

Беләсезме?” – дигәннәр.

 

Бездә сөт тә, май да, бал да –

Бөтен ризык тәме.

Ашау-эчү булган җирдә

Инде дөньяның яме.

 

Сезнең өчен яшәрәбез

Һәм чәчәкләр атабыз.

Сездән берни кирәк түгел,

Безне бары саклагыз.

 

Безнең белән шаярыгыз,

Уйнагыз, яратыгыз.

Көн саен сөт эчегез һәм

Безнең тәмне татыгыз.


***

Авылымдагы тынлыкны

Тыңларга кайткан идем.

Тынлыкка  мөкиббән китеп,

Сузылып яткан идем.

 

Яңгыр болытлары шулчак

Мин кайтканны белделәр

Һәм авылыбыз өстенә

Җыйнаулашып килделәр.

 

Бер-берсенә бәрелешеп,

Ялык-йолык  иттеләр.

Тынлык өстенә шифалы

Яңгыр сибеп киттеләр.


Их бер сөйләшәсе иде

Мәскәүдә туган малайлар

Тукай телен белә микән?

Тукай “Шүрәле” сен укып,

Рәхәтләнеп көлә микән?

 

Оясында ни күрсәләр,

Шуны эшли торганнардыр.

Әле бәлки кайберләре

Бигрәкләр дә уңганнардыр.

 

Шәҗәрәне беләләрдер,

Догалар да ятлыйлардыр.

Без Мәскәү татарлары дип,

Ялкауланып ятмыйлардыр.

 

Мәскәү малайлары белән

Их бер сөйләшәсе иде.

Киләчәгебез турында

Утырып киңәшәсе иде…


Әбием – барометр

Минем әби – барометр,

Шундый оста фаразлый,

Явымнарны алдан әйтә,

Бернәрсәгә карамый.

 

— Каян беләсең, әби? – дим,

Миңа серең чиш әле.

— Син дә белерсең, кызым, — ди,

Минем яшькә җит әле…

 

Буыннарым хәбәр итә,

Яңгыр килсә сызлый, — ди.

Өлкәннәрдән явым-төшем

Җиңел генә узмый, — ди.