Мәктәп баласы өчен дөрес туклану ничек була?

Фото: pixabay.com

Бүгенге мәктәп баласының нәрсә ашап, ничек туклануы турында табиблар ни уйлый? Киоск саен ялтыравык кәгазьгә төрелгән чипсы–кириешкалар кызыктырып торганда, телеэкраннар шоколад рекламалары тулган заманда табиблар балаларыбыз сау–сәламәт үссен өчен ни киңәш итәләр? Без уй–фикерләрен сорап Казан дәүләт медицина университеты укытучысы, педиатр Илнур Илгиз улы Закировка мөрәҗәгать иттек:

— Мәктәп баласы көненә дүрт мәртәбә ашарга тиеш, — диде ул. — Аеруча иртәнге һәм төшке ашның калорияле булуы кирәк. Бала организмына аксым, май һәм углеводлар 1×1×4 микъдарында керергә тиеш. Рационында аш, итле һәм сөтле ризыклар, пешерелгән яшелчә, боткалар булуы шарт. Углеводлар дигәнне конфет һәм баллы ризыклар дип аңларга ярамый, углевод җиләк–җимәш хисабына керсен. Төшке аш көнлек калориянең 35 процентын тәшкил итсә, полдник — 10–15 процент. Ә бала мавыкмаска тиешле ризыклар, әлбәттә, кириешка һәм чипсы һәм шоколад. Алардагы экстраактив матдәләр ашказанын ярсыталар гына.

Рәсми статистика булмаса да, соңгы елларда балалар арасында ашказаны–эчәк авырулары нык артты. Чөнки бала вакытлы–вакытсыз коры, сыйфатсыз ризык ашап йөри. Әлбәттә, гастрит һәм язва килеп чыгуның сәбәбләре төрле. Чир ашказанында яшәүче хилекобактерпилерийларның азуыннан да, стресслардан да килеп чыга. Ә шулар өстенә дөрес тә тукланмасаң, чирнең көчәюе өчен җирлек була.

Татарстан Президенты авыру малайның хыялын чынга ашырды!

«Теләкләр чыршысы» акциясендә катнашкан 13 яшьлек инвалид малай Камил Бариевның  хыялы чынга ашты. Аңа «Уральские пельмени» тамашасына билетны «Теләкләр чыршысы» хәйрия акциясе кысаларында Татарстан Президенты Рөстәм Миңнеханов исеменнән тапшырганнар.

Камил «Пирамида» мәдәни-күңел ачу комплексында аларның концертында булды. «Әлбәттә, бу безнең өчен бәхет. «Уральские пельмени» артистлары белән очрашу аның хыялы иде», – диде малайның әнисе Гөлназ.

Камилнең әнисе артистларга пилмән формасында магнитлар, гөбәдия һәм чәкчәк бүләк итте. Камил белән аның әнисе коллективка хат та язган. Аларга иҗади уңышлар теләгәннәр һәм танышу өчен рәхмәт әйткәннәр.

«Татар чәкчәгеннән дә «текәрәк» бернәрсә юк», дип бәяләгән бүләкне Максим Ярица.

***

Татарстан Президенты Полина Щербичның һәм Вячеслав Банцыревның да теләкләрен үтәгән. Полина Яңа ел каникулларында Кремльдә чыршы бәйрәмен карарга теләгән, ә 13 яшьлек Вячеслав  зур таган турында хыялланган. Аның үз йорты ишегалдында әнисе белән таганда атынасы килгән.

//tatar-inform.tatar//

Һөнәрле үлмәс — Зөфәр хәзрәт Тәхавиев турында

Зөфәр хәзрәт Тәхавиев күп кенә дини китаплар авторы. Аны бик теләп төрле авылларга взгазь укырга чакыралар. Лаеклы ялга чыкканчы ул хәрби хезмәттә булган. Ике ул үстергән. Бүген ул үз куллары белән теплицада яшелчә-суган үстереп, кәсеп итә.

«Сабантуй» журналы белән җир тирәли…

Эт хуҗасын коткарган

Әлеге хәл Яңа ел төнендә була. АКШта яшәүче 64 яшьлек Боб исемле кеше утын алырга дип урамга чыга. Бәхетсезлеккә каршы, юка гына киенгән ир таеп егыла. Муен умырткасына шулкадәр зыян килә ки, хәтта урыныннан да кымшана алмый. Күршеләре шактый ерак тору сәбәпле, аның кычкыруын ишетми. Бары хуҗаның 5 яшьлек Келси исемле эте генә ярдәмгә ашыга. Урамда бик салкын була. Яныннан да китмичә, хуҗасын үзенең тәне белән җылыта башлый. Аңын җуймасын өчен кулларын, битләрен ялый. Үзе исә, ярдәм сорап өрүен дәвам итә. 20 сәгать узгач кына этнең тавышын күршесе ишетеп ала. Ашыгыч ярдәм машинасы чакырта. Менә шулай дүрт аяклы дусты ярдәме белән Боб исән кала.


Акула белән дуслык

Күпләр акулаларны ерткыч су хайваны буларак кабул итә. Чөнки барлык мультфильмнарда, киноларда аларны шулай тасвирлыйлар. Ә менә Австралиядә яшәүче Рик Андерсон моның киресен исбатлый. Ул су астында йөзү буенча инструктор булып эшли. Су астына төшкән саен янына бер акула йөзеп килеп, аны “кочаклый”. Рик әлеге акула белән беренче тапкыр 7 ел элек очраша. Анда әле ул кечкенә – 15 см озынлыкта гына була. Әлеге күренешне күргән башка дайверлар моңа ышана алмый хәтта.  Бәлки акулалар чыннан да кешеләр өчен алай ук куркыныч җан ияләре түгелдер? Ни генә булса да Рик белән акуланың әлеге мөнәсәбәте – дөньядагы иң матур дуслык үрнәге!


Бәбкәгә ирек ошамаган

Американлы Майк Джайванджи  елга буенда ял иткәндә, суда йөзеп китә алмаган каз бәбкәсенә тап була. Ул аны үскәнче үзендә калдырырга уйлап, өенә алып кайта. “Кайла” дип исем дә куша. Бәбкә ике ел Майк белән яши, һәрвакыт аңа ияреп йөри. Каз булып җиткәч, Майк аны иреккә чыгарырга уйлый. Шәһәрдән читкәрәк алып чыгып, очыртып җибәрә. Ләкин өенә кайтып керсә, кош аны шунда көтеп тора… “Кайла” бик акыллы һәм бераз көнчел дә. Майк үзе: “Кайла – иң якын дустым, андыйлар турында хыялланырга гына була”, – ди.


Тәртип саклаучы этләр

Чили республикасының  Кильпуэ шәһәрендә урамда хуҗасыз йөрүче этләргә ярдәм йөзеннән, аларны эшкә урнаштыра башлаганнар. Нинди эш дисезме? Этләргә махсус әзерлекләр уздырып, полиция хезмәтенә алалар икән. Яшел төстәге жилет кигән йонлач дуслар, полиция хезмәткәрләренә ияреп, урамда тәртип саклый.  Әлеге эш өчен аларга яшәү урыны һәм ашарларына бирәләр. Менә шулай итеп этләр яңа яшәү рәвеше алып бара, җәмгыятькә файда китерә.


7 яшьлек кызны “Google”  эшкә чакырган

Британиядә яшәүче 7 яшьлек Хлои Бриджуотер үзе турында резюме язып, аны  “Google” компаниясенә юллый. Әлеге идея аңа әтисе белән яхшы эш урыны турында сөйләшеп утырганда килә. Әтисе аңа компьютердан “Google” офисын күрсәтә, ничек эшләүләре турында сөйли. Кызчыкка бу эш бик ошап китә һәм шундук хат язарга уйлый. Аның кыскача эчтәлеге болайрак була: “Кадерле “Google” хуҗасы! Минем үскәч сездә эшлисем килә. Бигрәк тә шоколад фабрикасында. Мин әле компьютерда утырырга да яратам…” Иң кызыгы Хлоиның хаты җавапсыз калмый. Корпорациянең генераль директоры Саундар Пичаи: “Алга таба да шулай тырышлыгыңны дәвам ит. Мәктәпне тәмамлагач, без синнән кабат резюме көтеп калабыз”, – дип хат юллый. Әлеге вакыйга кызны тагын да рухландырып җибәрә.