«Рөстәм абый, бирмә машина!» яки Федераль Сабантуйдан соң уйланулар…

“Лаеклы бүләк баш батырга бирелмәгән. Бүләк иясен җирәбә ярдәмендә ачыклаганнар…” 9 июньдә Новосибирскида узган Федераль Сабантуеннан соң шулай дип сөрән салучыларның әлеге фикере ике көн инде тынгылык бирми. Ышанмассыз, әмма дөресе шундый: төнлә торып та уйланам, күңелдә туган фикерләр көрәшен хөкем итәм.

Кем дөрес?

Бәхәс туган җирлектә кемнең хаклы булуын ачыклавы кыен. Ике як та үзен дөрескә санаячак. Федераль Сабантуе тирәсендәге шау-шу нәкъ менә шундый – чишелеше табылмый торган җирлек. Хәтта вакыйгалар агышын читтән күзәтүче кеше буларак үземдә дә каршылыклы фикерләр туа. Шуңа да фикерен белдергән һәр кеше үзен хаклыга санарга да тиеш түгелдер. Дүрт аяклы ат та абына бит. Ни сәбәпле абынуын һәм бу хәл кабатланмасын өчен уртак фикергә килү юлларын эзләргә кирәк. Бу очракта туйдан соң үпкә белдерерлек булмас өчен алга таба нишләргә кирәклеген ачыклау мөһим. Димәк, фикерләр күп булу да комачау итмәс. Кулга шунлыктан гына каләм алынды.

Чабаксардан сабак алып

Сабантуйда автомобиль хуҗасын җирәбә ярдәмендә ачыклау үрнәген федераль дәрәҗәдә беренчеләрдән булып 2018 елда Чабаксардагы Сабантуйда күрсәттеләр. Федераль Сабантуйда тәүге тапкыр баш батырның машинасыз калу очрагы иде бу. Быел шуның үрнәгендә кабат җирәбә уйнатылды. Әмма, аермалы буларак, быел бәхетен сынап карарга Татарстан көрәшчеләре дә кертелде. Димәк, узган елгы ялгыштан сабак алынган.

– Җиңү рәхәт инде, ләкин төп бүләкне лотереяга уйнату гына гарьләндерә. Нигезләмәдә баш батырга тәкә һәм машина биреләчәк дигән, тәкәсе бар, ә машинаны яңадан уйнаталар, – дип канәгатьсезлек белдергән иде былтыр 2018 елгы Федераль Сабан туеның баш батыры Муса Галләмов.

– Ошап бетми инде, болай булырга тиеш түгел. 60 килограммлы көрәшче авыр үлчәүдәге белән көрәшә алмый, диләр. Нишләтәсең инде? Менә минем президент буласым килә. Буламмы соң президент? Булмый бит. Сайланган кеше генә президент, сайланган батыр гына батыр була. Машинаны аннан алу дөрес түгел, – дигән быелгы баш батыр Раил Нургалиев.

…Новосибирскида төп приз – “Фольксваген Поло” автомобилен җирәбәдә Казан егете Лениз Абдуллин отты. Бу уңайдан Раилнең тагын бер фикере игътибарны җәлеп итә: “Әйбәт булды Татарстан егетенең отуы. Шунысы шатландыра”, ؘ– диде батыр. Татарстан өчен горурланып әйткәндер, шәт. Алайса күңелгә юньсез уйлар керә.

Машина – батырга!

Шундый фикер белдерүчеләр шактый. Сүзләрендә хаклык та бардыр: ике дистә еллап уздырылып килә торган Федераль Сабантуеның беренче елларында ук автомобильне нәкъ менә көрәш батырына, дип бирә башладылар. Әмма ул чакта кабул ителгән карарның дөрес булуын исбатлавы кыен бит. Бәлки шул вакытта ук канәгать калмаган кечерәк гәүдәле көрәшчеләр дә булгандыр, фикерләрен ирештерә генә алмаганнардыр?!

Бу урында куен дәфтәремә язып барган соңгы алты-җиде елдагы баш батырларны исегезгә төшерәм:

2013 ел – Төмән – Раил Нургалиев.

2014 ел – Томск – Раил Мараков.

2015 ел – Красноярск – Муса Галләмов.

2016 ел – Түбән Новгород – Рөстәм Садыйков.

2017 ел – Әстерхан – Раил Нургалиев.

2018 ел – Чабаксар – Муса Галләмов.

2019 ел – Новосибирск – Раил Нургалиев.

Менә монысы мәсьәләнең икенче ягын кузгата: шул еллар эчендә автомобильне ничә тапкыр батыр исеменә лаек көрәшче отты икән? Мин өч елны санадым. Батырлар гафу итсен: әмма 2014 елда – Раил Мараков, 2015тә – Муса, 2016 елда Рөстәм шул елгы Сабантуйларда катнашкан Раил Нургалиевны ота алырлык хәлдә түгел иде әле. Спектакльне аңлаганы аңлады, көрәшне гомерендә берничә тапкыр гына күрүчеләр сызгыра-сызгыра “батыр”га кул чапты.

…2016 елда чираттагы «спектакль»гә Түбән Новгородта аяк чалдылар. Федераль Сабантуена “пропискага кергән” көрәшчеләр сценарие буенча ул елны Фәрхәт Фәйзуллин батыр калырга тиеш иде, шуның нигезендә Раил бу юлы Фәрхәткә юл куйды. Әмма җирле көрәшче Рөстәм Садыйков һәм аны яклаучыларга вакыйгалар агышының шуннан да яхшырак юнәлеше була алмый иде инде. Кыскасы, сценарий бозылды, җирле көрәшчене батыр калдырдылар, Татарстанлылар терсәкне тешләргә омтылып карады, әмма соң иде инде. Их, менә шул вакытта спектакльне читкә куеп, Раил Нургалиев җирле көрәшчегә каршы үзе чыкса һәм аны күкләргә чөеп сыртына салсамы?!

 

Нишләргә?

Президентка хат язарга, моннан соң машина бирмәвен сорарга кирәктер, бәлки. Туйдан соң тукмаклашып ятмасыннар өчен… Келәмдә елый-елый көрәшсә дә, баш батыр кала алмаячак 80 килограммга кадәрге көрәшчеләрне үпкәләтмәс өчен… Машина бүлешүләрнең яңадан-яңа схемаларын уйлап тапмас өчен… Ә машина акчасын кая куярга белмәсәк, балалар арасында көрәшне үстерүгә тотыйк. Бер дә булмаса, авылларда бетеп баручы Сабантуйларын җанландырып җибәрергә була. Милли бәйрәмне шәп итеп уздырган авыл җирлекләрен барлыйсың да, ун авылга 100әр мең сум акча бүлеп бирәсең. Шәп бит, ә?!

– Хәзер шундый фикергә килеп барам: гомумән, машина хәтле машинаны Сабантуйда куймаска кирәк, – дип белдергән Татарстан Көрәш федерациясе башкарма директоры Равил Хәйруллин “Интертат” басмасына. –  Ә баш батырга зур, матур тәкә бирергә. Чөнки баш батырга көрәшкәндә 2-3 кеше көрәшә. Моның өчен генә машина бирү дөрес түгел дип саныйм.

Равил әфәнде фикеренчә, көрәшчеләр тәкә, чиккән сөлге өчен дә көрәшергә әзер.

– Ике машина куйсыннар: 80гә кадәр берсен, яки берне дә куймасыннар, – монысы Раил Нургалиев фикере. – Тәкә генә куйсыннар, әмма тәкәгә беркем дә көрәшеп йөрмәячәк.

Шул сүзләре белән Раил үз гамәлләренә каршы килә. Чөнки быелгы Федераль Сабантуенда автомобильнең лотерея ярдәмендә уйнатылачагы алдан ук әйтелде. Димәк, батыр булып та, машинасыз кайту ихтималы зур иде. Ә бит барды, батыр да калды, хәтта баш батыр исеме көрәшергә дә чыкты һәм бер ел дәвамында Федераль Сабантуеның гамәлдәге батыры, дип горурланып йөрерлек исемгә лаек булды. Менә шул исемне батырдан гайре берәү дә үзенеке итә алмаячак. Хәтта җирәбә ярдәмендә дә! Горурланырлыкмы? Әлбәттә!

…Горурлык, димәктән, редакциябез ишегалдын журналистларның 2018 елгы «Бәллүр каләм” бәйгесенең Гран-при иясе Габделбәр абый Ризвановка бирелгән “Калина” автомобиле бизи. Бер ел вакыт узса да, ябыштырган бизәкләре әле дә куптарылмаган. Хуҗасының горурлык хисләре кичерүе сизелеп тора. Журналистларның иң-иңенә, берәүгә генә һәм елга берне генә бирәләр аны. Очраклылык микән: бер генә көрәшченең дә Федераль Сабантуеның төп призы – бизәкле автомобилендә үз районында еллар буе җилдергәнен күргән юк. Көрәштә дә, район саен машина өләшүгә чик куеп, елга берне нәкъ менә Федераль Сабантуенда гына бүләк итәр сәгать сукмады микән?! Батыр калуның дәрәҗәсен арттырыр өчен.

Фәрит САЛИХОВ,

фотолар: Татар-информ

Бәйрәм узышы – Казанда балаларның картинг ярышлары (ФОТО)

Татарстан Хөкүмәте кубогына картинг ярышлары инде ундүртенче тапкыр уздырыла. Казанның “Форсаж” картинг үзәге быел республиканың 35 шәһәр һәм районыннан 249 узышчыны үзенә җыйды.

Традицион ярышларның 1 июнь – Халыкара балаларны яклау көнендә уздырылуы гаҗәп түгел. Чөнки бәйгенең төп максаты – куркынычсыз йөртү осталыгын арттыру юлы аша балалар белән һәлакәтләр санын киметү. Моннан тыш оештыручылар техник спорт төрләрен популярлаштыру һәм анда катнашучыларның йөртү осталыгын арттыру бурычын тормышка ашыруны да максат итә.

Ярышлар ике класска бүленеп уздырылды: 8-12 яшьлекләр 6,5 ат көченә ия Honda GX200 карт машиналарында узышса, өлкәнрәкләр, 12-16 яшьлек үсмерләргә, куәтлерәк “тимер ат”лар – 9 ат көченә ия Honda GX270 машиналары ышанып тапшырылды.

Иң җитез узышчылар:

1. Алмаз Мәхмүтов (Сарман).

2. Егор Силантьев (Казан).

3. Кәрим Шәрәпов (Алабуга).

Өлкәнрәкләрдә:

1. Николай Фролов (Казан).

2. Егор Кузьмин (Казан).

3. Данил Телепов (Чаллы).

Командалар арасында беренче урынга “Форсаж” картинг-клубы күтәрелде. “Чынгызхан” командасы – икенче, “МАК-Титан” өченче урында.

Яшь батырлар Сабантуйларга әзерләнә (ФОТО)

26-27 апрель көннәрендә Актанышта Татарстаннның беренче Президенты кубогына үсмерләр арасында көрәш ярышлары узды. Командалар Актанышка югары әзерлек белән килә. Сезонның соңгы ярышы бит ул, ахыр чиктә, Сабантуйларга да әзерлек этабы булып тора.

Ярышның иң матур мизгелләрен тәкъдим итәбез:

 

Илназ Мөхәрләмов фотолары

 

Ярышның җиңүчеләре

 

ҮРНӘК ЯШЬТӘШ: Сочины яулаган футболчылар!

Самир, Костя, Алан – дуслар. Аларны футбол, футболчы булу теләге һәм әлеге спорт төре белән бәйле башка хыяллар берләштерә.

…Ун-унбер яшьлек малайларга ияреп, Хезмәт резервлары стадионына таба атлыйбыз. Казанның Вахитов районы спорт мәктәбе футболчылары биредә шөгыльләнә. Ә өч дус – шул мәктәпнең футбол түгәрәге шәкертләре.

Малайлар белән озаклап сөйләшеп торырга гына вакыт юк: тренер-укытучыларының көчле сыбызгы тавышы аларны санаулы секундлар эчендә бер сафка тезә. Туп тибеп кенә йөрми икән малайлар. Күнегүләр вакытында шактый тир түгүләрен читтән күзәтеп торучыларга да чамалавы кыен түгел. Профессиональ футболчыларның хәлиткеч матчка әзерлек вакыты диярсең. Ара-тирә тренер абыйларының шелтәсен дә колакларына киртләп куярга туры килә.

– Тренерның таләпчән булуы файдага гына. Тырышыбрак шөгыльләнәбез, – ди күнегүләрдән соң малайларның Константин Кулаков исемлесе.

– Кирәк вакытта шаярта да белә ул, – дип бүлдерә дустын Алан Әгъләмов. – Бик дуслар без.

– Күнегүләрдәге тырышлык җиңүгә китерә, – дип тулыландыра дусларын арада иң чая футболчы малайларның берсе булган Самир Әхмәдуллин. 5 яшьтән бирле футбол белән шөгыльләнә икән инде ул. – Уңышларыбыз бар: әле күптән түгел Сочидагы турнирда да җиңү яулап кайттык.

Үзләре генә футболчы булу турында хыялланып калмый малайлар, яшьтәшләрен дә футбол түгәрәкләренә чакыралар. Өйдә эшсез ятканчы, спорт белән дус булуның файдасы күп, дип мактанып алу да килешә үзләренә.

– Һәр әти-әни баласының сәламәт булуын теләсен иде. Нинди спорт төре булуы мөһим дә түгел, фәкать бала-чага эш белән мәшгуль булырга тиеш, – ди үсеп килүче футболчыларның тренеры Владимир Баранов. – Спорт физик яктан ныгыта, балаларның режимын җайга сала. Балалар бик тиз үсә бит. Шуңа да аларның буш вакытларын файдаланып калырга кирәк.

…Заманында үзе дә профессиональ футболчы булган, Үзбәкстан җыелмасы өчен чыгыш ясаган остаз кул астында шөгыльләнүче 2008 елгы төркем малайларының уңышлары шактый – кышын манежда уйнап Казан, Татарстан беренчелеген отканнар. Яңа сезонга әзерлекне ныгыту максатыннан Сочига барып, “Кара диңгез кубогы” дип атала торган турнирда 14 команда арасында беренче урын яулап кайтканнар.

– Тренер-укытучы буларак безнең максат – шәкертләребездән республика командаларына эләгә алырлык футболчылар әзерләү, Татарстанда футболның дәрәҗәсен күтәрү, – ди тәҗрибәле остаз. – Сүз дә юк, барысы да профессиональ футболчы да булмас. Һәр төркемнән кимендә 3-4 футболчы шул югарылыкка күтәрелә икән, максатлар чынга ашкан дигән сүз. Моның өчен шартлар бар, спорт мәктәбебез республикада алдынгылар рәтендә. Тырышлык кына кирәк.

Ә малайлар тырыша. Күнегүләрдә эшкә әз генә салкын карасаң да, составка эләкмәскә мөмкин булуын яхшы аңлый алар. Әнә, спорт мәктәбенең футбол түгәрәгенә керергә теләп ел саен 60-70ләп малай килә, ди Владимир Баранов. Ә аларның иң үҗәтләре генә “иләктән” төшми кала һәм мәктәпкә алына. Самир, Костя, Алан һәм аларның бүгенге командасы – шундыйлардан!

2008 елгы төркем футболчыларының соңгы казанышлары:

Казанның кышкы беренчелеге – 1 урын.

Татарстанның кышкы беренчелеге – 1 урын.

“Кара диңгез кубогы” турниры (Сочи) – 1 урын.   

 

 

Фәрит Салихов,

Илназ Мөхәрләмов фотолары 

 

 

 

 

Салават Фәтхетдинов: «Бүген барыгыз өчен дә җан атам!»

«Аннары соң инде сез миңа һәм улым Рөстәмгә көч биреп торырсыз дип ышанам. Апрель ахырында Чечняда булачак автоспорт ярышларында ул Татарстан җыелмасы өчен чыгыш ясый. Көчле бәйге булачагы инде бүген үк билгеле, Рөстәмгә сезнең рухи ярдәмегез бик кирәк!»

Үз призына Теләчедә узган чираттагы көрәш турнирында Татарстанның халык, Россия һәм Башкортстанның атказанган артисты Салават Фәтхетдинов сәламләү сүзен шулай башлады. Үсмерләр һәм кече яшьтәге балалар арасында инде 4 нче тапкыр уза торган ярышның  символик мәгънәсенең асылында да шушы фикер ятадыр, мөгаен. Кайсы спорт төрендә генә булмасын, үзара ярдәмләшеп, бер-береңә хөрмәт күрсәтеп яшәү кирәк. Шул принципларга тугры калганда гына көчле, ышанычлы шәхесләр үсеп чыгачак. Шул вакытта гына милләтнең дә киләчәге өметле булачак.

Мәгълүм булганча, Салават Фәтхетдиновның улы Рөстәмгә машина җене кагылган. Аның 18 яше тулганчы ук спорт остасы нормативын үтәгәне аерым игътибарга лаек. Әтисе исә улы турында сөйләгәндә дулкынлануын яшерми. «Автоспорт дөньясында да көнләшүчеләр бихисап. Әле менә булачак ярышны гына алыйк. Инде бүген үк аңа каршы ниндидер яшерен эшләр алып барыла дигән хәбәр әйттеләр. Янәсе, быел Рөстәмне җиңдермәскә тырышачаклар. Ярар, татарлар авырлыклар каршында, киресенчә, ныгыйлар, көчәяләр генә, җиңүгә омтылыш арта гына!» – дип сөйли Салават автоспорттагы хәлләр турында.

Инде көрәшкә әйләнеп кайтыйк. Теләчедә хаклы рәвештә төпләнеп калган Салават Фәтхетдинов призларына көрәш ярышы быел дүртенче тапкыр узды. Нәкъ менә Теләчедә төпләнүе дә бу төбәкнең көрәш дөньясында алдынгылыкны биләп торуы белән бәйледер. Теләче көрәшчеләрен республика гына түгел, Россия һәм дөнья күләмендә дә яхшы беләләр. Хәзер Биектау өчен чыгыш ясаучы Раил Нургалиев Теләче өчен көрәшеп йөргән вактыларында иң күп җиңүләрен яулады, Илдар һәм Фирзәр Гыйниятуллиннар бүген Теләчедә балаларны шөгыльләндерәләр, дөнья чемпионы Азат Нурмөхәммәтов әле дә келәмдә билбирмәс батыр булып тора, бертуган Шәйхетдиновлар, Мараковлар – саный китсәң шактый батырлар искә төшә. Көрәш белән янып-көеп яшәгән Теләче җирлегендә Салават уздырган ярыш берничек тә артык  була алмый.

 

Елдан-ел көрәшчеләр саны арту әлеге ярышларның дәрәҗәсе турында ачык сөйли. Узган ел 19 команда бик күп булып тоела иде, ә быелгы 34 команда киләсе елга тагын күпмегә артыр икән? Димәк, быелгы 315 көрәшче киләсе елга тагын да күбәячәк бит!  Киләсе ел дигәннән, Салават Фәтхетдиновның әлеге турнирны 5 тапкыр уздыргач россиякүләм итәргә кирәклеге турында әйткән сүзе бар иде. Быел бу фикерне ул тагын бер тапкыр җөпләде. Берничә елдан соң болай булса Татарстанда Актанышта уза торган Татарстанның Беренче Президенты кубогына ярышлар белән беррәттән тагын бер шундый дәрәҗәле ярыш барлыкка киләчәк.

Көрәшче Сибгатуллиннар династиясе

Чыгышы белән Актаныштан булган 2000 еллар батыры Илшат Сибгатуллинны көрәш сөючеләр яхшы хәтерли. 2007 елда аның белән бәйле истәлекле вакыйганы да күпләр белә: Илшатның өч игезәк уллары туган иде! Хәсән, Фазыл, Фаяз Сибгатуллиннар – бүген Чаллы шәһәрендәге 2нче гимназиянең 5 нче сыйныф укучылары. Мәктәптә оешкан көрәш түгәрәгенә дә йөриләр. Илшат улларын Теләчегә дә алып килгән иде.

– Өч улым да Чаллыда Илгиз абыйлары Шәмсевалиев карамагындагы көрәш түгәрәгенә йөри. Игезәк булсалар да, характерлары буенча да, укудагы күрсәткечләре буенча да, көрәштәге нәтиҗәләре буенча да өчесе дә өч төрле алар. Узган ел, мәсәлән, әлеге турнирда Фаяз белән Фазыл гына көрәшеп беренчесе – 3нче урын, икенчесе 2нче урынны яулаган иде. Быел инде Хәсән дә туганнарына кушылды. Җәйләрен Актаныш районы Такталачык авылында бабалары янында уздыралар инде. Такталачык Сабантуенда әле укырга кергәнче үк инде көрәшкә чыгалар иде. Гимназиядә укый башлагач инде ныклап шөгыльләнә башладылар.

«Киләчәктә профессиональ көрәшче булуларын телисеңме соң?» – дигән сорауга Илшатның җавабы әзер:

– Үзләренең теләкләре ничек була инде, мәҗбүриләмим. Көрәштән тыш башка шөгыльләр дә бар бит, әтиләре көрәшче булгач та, малайлары да көрәшче булырга тиеш, дигән сүз түгел. Шәһәр мәктәбендә спорт юнәлешендә булсынмы, белем алудамы – мөмкинлекләр җитәрлек. Аларның укуда һәм спортта нәтиҗәләре була икән, мин шатланам гына. Киләчәктә нәрсә буласын бер Алла гына белә, – дип тәмамлады сүзен Илшат.

Алга китеп шуны әйтик: быелгы ярышта өч игезәкнең Фазыл исемле яшь батыры гына призлы урын яулады.

 

«Балалар да көрәшми бит…»

Көрәш буенча соңгы вакытта узган ярышлардан соң җәмәгатьчелек күп кешене борчыган бер мәсьәләгә үз карашын белдерә. Сүз кагыйдәләргә кергән үзгәрешләр турында, бигрәк тә аркага яткан көрәшчегә бирелгән кисәтүнең нәтиҗәсе хакында. Бер очракта бу көрәшчене дөрес алым ясарга этәрсә, икенче очракта көндәшенең көрәшмичә генә җиңүенә китерә. Күп хөкемдарлар ярыштан соң матур алымнар артуы турында фикер әйтсә, көрәшмәүче, бары тик «накрывание » белән җиңеп чыккан «батырлар» саны артуын да күрми мөмкин түгел.

«Алым ясап ике очко алган иде бит инде, көндәшенең бер техник баллы да юк, тик менә кисәтүләр аркасында көрәшче егетем төшеп калды. Инде хәзер үзе дә алым ясамыйча төртеп егып кына көрәшергә җыена. Болай барса матур көрәш күрсәтергә өйрәтү ай-һай авыр булачак!» Күп еллар балалар белән эшләүче тренер сүзләре бу.

Теләчедә узган ярышның баш хөкемдары, Теләче районы Башкарма комитет җитәкчесенең социаль мәсьәләләр буенча урынбасары Азат Нурмөхәммәтов ярыш алдыннан ук иң кечкенә авырлыкта көрәшүчеләргә карата хәерхаклык күрсәтергә чакырды. Беренче тапкыр аркага ятканда кисәтү бирмичә генә көрәштеләр орчык батырлар. Бер караганда, бәхәсләшкән ике якның да мәнфәгатьләре искә алынды, шулай да канәгатьсезлек барыбер кала бирә.

Балалар көрәшендә аркага ятуны ничек бәяләргә? Алым ясарга талпынган малайны куәтләп кисәтүне бирмәскәме, әллә инде икенче ярышларда шушы хатасын кабатламасын өчен кисәтергәме? Тегесенең дә монысының да артыннан тагын сораулар калкып чыга. Алайса саклануга өстенлек биреп көрәшергәме? Әллә инде тренер өйрәткәнчә этеп егып караргамы? Кыскасы, көрәш кагыйдәләрендә үзгәрешләр аның методикасы, ахыр чиктә милли спорт төренең асылы белән тәңгәлләшкәнче әле күп вакыт кирәк булачагы шиксез.

Теләчедә хөрмәт һәркемгә 

Җирлекнең казанышлары төпле җиткәчелек итүдән һәм кешеләрнең тырышлыгыннан туа. Теләчедәге бу ике якның аңлашып эшләве соклануга лаек.  Район башлыгы Илдус Зарипов та көрәшнең берләштерү көче барлыгын ассызыклый: «Монда килгән халык беренче чиратта аралашу, берләшү өчен җыелгандыр дип ышанам. Теләчелеләр барлык кунакларга да шат кына, ә көрәш мәйданы безне тагын да ныграк берләштерә!» – диде ул ачылыш тантанасында.

Иң мөһиме – җирле батырларны хөрмәтләү. Аларга киләчәктә дә туган як данын яклап чыгыш ясарга этәргеч бирү. Андыйлар Теләчедә байтак, әлеге ярыш ачылышында рәсми ярышлардагы уңышлары өчен кайбер яшүсмер спортчыларга акчалата бүләк тапшырылды. Шулай ук Теләче районы башлыгы урынбасары Айрат Гыйльван улы Фәтхуллин һәм Теләче районы Яшьләр эшләре, спорт һәм туризм бүлеге Илдар Гыйниятуллин Спорт министрлыгының рәхмәт хатлары белән бүләкләнде.

 

Илназ Фазуллин


 

ЯРЫШТА ҖИҢҮЧЕЛӘРНЕҢ ИСЕМЛЕГЕ ҺӘМ ФОТОРЕПОРТАЖ

 

Салават Фәтхетдинов призларына көрәш ярышы (ИСЕМЛЕК, ФОТО)

Бүген Теләчедә 4 нче тапкыр Татарстанның халык, Россия һәм Башкортстанның атказанган артисты Салават Фәтхетдинов призларына балалар арасында көрәш ярышы узды. 315 көрәшче һәм 34 команда катнашкан чарадан язма әзерләнә. Әлегә фоторепортаж карагыз һәм җиңүчеләр белән таныша торыгыз:

 

 

Илназ Мөхәрләмов фотолары