“Сабантуй” батырларын барлады

Ике көнгә сузылган көрәш тәмам: Биектау районында “Сабантуй” журналы призына узган республика беренчелегенең җиңүчеләре ачыкланды. Келәмгә чыккан 565 көрәшченең 18енә генә батыр калу бәхете елмайды.

Соңгы ике елда “Сабантуй” журналы призына көрәш ярышларын үсмерләрнең яшенә карап ике төркемгә бүлеп уздыра башладылар. Шуңа да ошбу турнир чын мәгънәсендә Сабантуен хәтерләтә. Быел, мәсәлән, мәртәбәле турнирда үз көчен сынарга дип 565 көрәшче келәмгә чыкты. Бу – рекордлы күрсәткеч, 1986 елдан бирле уздырыла торган турнир тарихында мондый хәлнең булганы юк иде әле.

2005-2006 елда туган көрәшчеләр арасында чемпионнар:

Рамил Гатауллин (Саба, 36 килограмм), Нияз Хәлиуллин (Саба, 40 кг), Гадел Мусин (Мамадыш, 45 кг), Марсель Дәүләтшин (Теләче, 50 кг), Фирзәр Хәйруллин (Биектау, 55 кг), Динияр Муратов (Арча, 60 кг), Ислам Шәйдуллин (Киров-Мәскәү районы, 65 кг), Румиль Семкичев (Әлмәт, 70 кг), Айзат Гыйниятуллин (Түбән Кама, 75 кг). Командалар арасында Саба – беренче, Мамадыш – икенче, Теләче өченче урында.

2003-2004 елда туган көрәшчеләр арасында чемпионнар:

Илназ Хәмидуллин (Әлки, 45 киограммкг), Рубин Рәҗәпов (Әлмәт, 50 кг), Азимҗан Котбетдинов (Авиатөзелеш-Яңа Савин, 55 кг), Рафаэль Хәсәншин (Әлмәт, 60 кг), Рүзәл Тимергалиев (Кукмара, 65 кг), Инсаф Кәримуллин (Кукмара, 70 кг), Вадим Васильев (Чаллы, 75 кг), Рүзәл Багиров (Авиатөзелеш-Яңа Савин, 80 кг), Илмир Хәсәншин (Түбән Кама, 100 кг). Командалар арасында Балтач – беренче, Кукмара – икенче, Әлмәт көрәшчеләре өченче булды.

Чемпионнар 15-16 мартта Казанда Россия беренчелегендә Татарстан данын яклап чыгыш ясаячак.

Сүз уңаеннан, ярыштан тулы фоторепортаж әзерләнә: безнең сайтны күзәтеп барыгыз…

“Сабантуй” призына бил алышырга рекордлы санда көрәшче җыелды /фото/

Биектау республиканың үсмер көрәшчеләрен үзенә җыйды: 20-21 февраль көннәрендә биредә “Сабантуй” журналы призына республика беренчелеге уза. Мәртәбәле турнирда үз көчен сынарга дип 565 көрәшче келәмгә чыгачак. Бу – рекордлы күрсәткеч.

Бил алышулар үсмерләрнең яшенә карап ике төркемгә бүленгән: җиңүче исеме өчен 2003-2004 һәм 2005-2006 елда туган көрәшчеләр көч сынаша.

1986 елдан бирле уздырыла торган турнирның соңгы елларда дәрәҗәсе күзгә күренеп артты. Биредә җиңү яулаучылар Россия беренчелегендә Татарстан данын яклап чыгыш ясаячак. Әлеге бәйгенең быелгысы 15-16 мартта Казанда узачак.

Быелгы ярышларның тагын бер үзенчәлеге бар: катнашырга килгән һәр командага “Сабантуй”дан – олы мәйданга” китабы да тапшырылды. Ике атна элек кенә табадан төшкән бу хезмәт – “Сабантуй” журналы редакциясе һәм Татарстан көрәш федерациясенең уртак проекты.

АКТАНЫШТА – БИЛ АЛЫШ:  Муса Җәлил истәлегенә көрәш бәйгесеннән 6 факт

14-15 февральдә Актанышта “Ватаным Татарстан” газетасы гамәлгә куйган Муса Җәлил истәлегенә көрәш буенча республика бәйгесе узды. 56нчы тапкыр узган бәйгедә Теләче көрәшчеләре икенче тапкыр җиңү яулады. Икенче урында – Актаныш, өченчедә Әлмәт көрәшчеләре. Традицион бәйгенең истә калырдай фактларын барладык.

 

1нче факт: брендка нигез салынды

Муса Җәлил истәлегенә көрәш турнирын Актаныш беренче тапкыр гына кабул итеп алды.

– “Актаныш игенчесе” дигән мактаулы даныбыз бар, “Актаныш моңы” дигәнен дә ишетеп беләсез. Теләгем – “Актаныш көрәшчесе” дигән исем-бренд булдыру, – ди район башлыгы Энгель Фәттахов.

Брендка нигез салынды – турнирда бердәнбер җиңүләре алтмышынчы еллар азагында ук булган актанышлыларга мактау баскычының иң югарысына күтәрелергә бер адым гына ясыйсы калды.

 

2нче факт: “алтын” бар да юк та кебек

Теләче районы көрәшчеләр командасы, ниһаять, көтеп алынган икенче җиңүләрен яулады. Уңышка ирешергә чит төбәк һәм район көрәшчеләре белән ныгу ярдәм итте. Моңа кадәр Түбән Кама өчен көрәшкән Шамил Локманов – 3нче, Менделеевск, Түбән Кама, Зәй аша Теләчегә килеп чыккан Ренас Кәлимуллин – чемпион булды. Теләче өчен тагын ике “алтын”ны да чит төбәк көрәшчеләре – Артур Зөлкәрнәев белән Муса Галләмов китерде.

– Теләче өчен көрәшергә чакырдылар, утырып сөйләштек һәм ризалаштым, – диде Шамил Локманов. – Нәтиҗәләр күрсәтеп булганда Теләче өчен алга таба да көрәшергә исәплим. Бүгенге 3нче урынмы? Канәгатьмен. Искәндәр Мортазинга каршы торып булмый әле.

 

3нче факт: чемпионнар үзгәрми

Быелгы бәйгенең чемпионнары – Тимур Милютин (Әлмәт), Искәндәр Мортазин (Актаныш), Рөстәм Сәләхов (Яңа Чишмә), Артур Зөлкәрнәев (Теләче), Ренас Кәлимуллин (Теләче), Раил Сәләхетдинов (Кукмара), Илнар Галимов (Актаныш), Айнур Сыртаев (Чистай), Муса Галләмов (Теләче), Марат Мөхәммәтҗанов (Түбән Кама).

Узган ел Биектауда чемпион исемен  яулаган көрәшчеләрне искә төшерик: Биектаудан –  Нәфис Миңнебаев, Ранис Галимуллин, Раил Нургалиев, Әлмәттән – Искәндәр Мортазин, Алабугадан – Ислам Фәләхов, Зәйдән – Ренас Кәлимуллин, Сергей Павлик, Казанның Яңа Савин районыннан – Илмир Төхфәтуллин белән Булат Мусин, Теләчедән Муса Галләмов.

Шулай итеп, чемпионнарның өчесе титулын саклап кала алды. Һәм аның берсе генә командасын үзгәртмәде.

 

4нче факт: тәкә Теләчегә кайтмады

Тамашачы баш батыр өчен көрәш көтте: Муса Галләмовның Түбән Кама пәһлеваны Марат Мөхәммәтҗановны сыртына салырга көче җитәрме, диеште алар. Сорауга җавап табылмый калды – баш батыр өчен көрәшкә чыгучы табылмады. Ә тәкә Теләче командасына насыйп булган икән – аны җиңүче командага бирделәр.

– Тәкәне Актанышта ук сатып калдырдык, – диде районның яшьләр эшләре һәм спорт бүлеге җитәкчесе Илдар Гыйниятуллин. – Акчасын фаҗигале рәвештә һәлак булган Мөслим районы имам-мөхтәсибенең якыннарына һәм үзебезнең райондагы бер мохтаҗ гаиләгә тапшырдык.

 

5нче факт: көрәш җәмәгатьчелеге китаплы булды

Актанышта көрәш барган көнне яңа гына табадан төшкән “Сабантуй”дан – олы мәйданга” дип исемләнгән китапны сату да оештырылды. “Сабантуй” журналы хезмәткәрләренең уртак тырышлыгы белән дөнья күргән китапны төп сатып алучылар – өлкән буын тамашачысы (50%), басмада үз исеме телгә алынган геройлар (40%) һәм калганнар (10%).

 

6нчы факт: Идиятов оттыра, көрәше сагындыра

Туган ягы өчен көрәшергә булган Рамил Хисмәтуллинга үз келәме булышмады – Актаныш батыры икенче әйләнештә тамашачылар арасына күчеп утырды. Кисәтүләр аркасында җиңүне кулдан ычкындыручылар бер Рамил генә булмады.

– Менә бу көрәшченең иң көчле вакытларын хәтерлисезме? – дип ишарәләде Рамил Арча батыры Илшат Идиятовка ишарәләп. – Мин аның шул вакыттагы көрәшен һәрчак үрнәк итеп китердем. Көндәшләрен күтәреп алып баш аркылы сыртларына сала иде. Менә шундый көрәш бетте. Җиңелүем түгел, менә шунысы күңелгә тиде.

Идиятов үзе булачак чемпион Айнур Сыртаевка оттырды, аны белгән тамашачы исә элеккеге көрәшен искә алып, көрәшчене алкышларга күмде.

 

Җиңүчеләр:

60 кг: 1 урын – Тимур Милютин (Әлмәт), 2 урын – Дмитрий Гайнеев (Лаеш), 3 урын – Фирзәр Гыйниятуллин (Теләче), Раббани Нургалиев (Актаныш).

65 кг: 1 урын – Искәндәр Мортазин (Актаныш), 2 урын – Илнар Закиров (Алексеевск), 3 урын – Шамил Локманов (Теләче), Ранил Ганиев (Кама Тамагы).

70 кг: 1 урын – Рөстәм Сәләхов (Яңа Чишмә), 2 урын – Динар Кәримуллин (Теләче), 3 урын – Равил Зайнашев (Яр Чаллы), Данил Хәйриев (Балык Бистәсе).

 75 кг: 1 урын – Артур Зөлкәрнәев (Теләче), 2 урын – Марат Кәримов (Әлмәт), 3 урын – Рамазан Садыков (Яңа Савин районы), Илнур Гобәйдуллин (Кукмара).

 80 кг: 1 урын – Ренас Кәлимуллин (Теләче), 2 урын – Роберт Шакиров (Яр Чаллы), 3 урын – Азат Габдрәшитов (Актаныш), Айзат Хадиев (Арча).

85 кг: 1 урын – Раил Сәләхетдинов (Кукмара), 2 урын – Ранис Галимуллин (Теләче), 3 урын – Илназ Зарипов (Саба), Салават Әсхәдуллин (Балтач).

90 кг: 1 урын – Илнар Галимов (Актаныш), 2 урын – Ильмир Төхвәтуллин (Яңа Савин районы), 3 урын – Марсель Гозаеров (Әлмәт), Раиль Сираев (Актаныш).

100 кг: 1 урын – Айнур Сыртаев (Чистай), 2 урын – Булат Мусин (Яңа Савин районы), 3 урын – Данис Закиров (Саба), Дамир Әдиятуллин (Әлмәт).

130 кг: 1 урын – Муса Галләмов (Теләче), 2 урын – Раил Нургалиев (Биектау), 3 урын – Раил Сагиров (Спасс), Валерий Рафиков (Актаныш).

130 кг: 1 урын – Марат Мөхәммәтҗанов (Түбән Кама), 2 урын – Фәрхәт Фәйзуллин (Питрәч), 3 урын – Ранис Гыйләҗетдинов (Яр Чаллы), Радик Воронов (Тукай).

Командалар: 1.Теләче, 2.Актаныш, 3.Әлмәт.

Фәрит Салихов

Татарстан егетләре Универсиадага китә

Кичә хәбәр итүебезчә, 2-12 мартта Красноярскида узачак XXIX Кышкы Универсиадада чыгыш ясаучы чаңгычылар командасы бүген юлга кузгала. Шунысы шатлыклы: командада составына Татарстаннан дүрт чаңгычы да бар!

Егор Казаринов, Христина Мацокина, Ольга Кучерук һәм Яна Кирпиченко – барысы да Идел буе физик культура, спорт һәм туризм академиясе студентлары. Универсиадада катнашу хокукын алар Зәйдә узган чаңгы ярышлары нәтиҗәләре буенча яуладылар. Мәсәлән, бүген Егор Казаринов 20 км арага масс-стартта алтын медальгә лаек булды. Башкалар да берничә көн дәвам иткән ярышларда призлы урыннарда калдылар.

Красноярскига юл алачак спортчыларны СССРның атаклы чаңгычылары, берничә тапкыр Олимпия чемпионнары Николай Зимятов белән Александр Завьялов озатачак.

Безгә исә якташларыбыз өчен җан атып бары тик җиңүләр генә көтәсе кала!

Фотолар ski-tatarstan.ru сайтыннан алынды.

Универсиадага команда туплана!

Быелгы кыш чаңгы ярышы вакыйгаларга бигрәк бай булды. Шунысы куанычлы: балалар һәм яшьләр катнашында узган чаралар елдан-ел арта.

Шушы көннәрдә Зәйдә студентлар арасында россиякүләм ярышлар төгәлләнде. Ватаныбызның 37 төбәгеннән 300 гә якын спортчы көч сынашкан чаңгы ярышлары аеруча әһәмиятле булды. Нәкъ менә әлеге ярышлар нәтиҗәсендә Красноярскта узачак XXIX Кышкы Универсиадага барачак команда тупланачак. Бу ярышлар сайлап алу буенча чираттагы этап булып тора. Сүз уңаеннан, студентлар Уеннары 2-12 нче мартта уздырыла. 12 февральдә чаңгы ярышлары командасы инде юлга да кузагалачак, барлыгы 16 спортчы әлеге төрдә Россия данын яклаячак.

Фото: ski-tatarstan.ru

Зәйдә узган ярышларга әйләнеп кайтсак, Идел буе физик культура, спорт һәм туризм академиясе командасы беренчелекне яулады. Икенче урында – Пенза өлкәсе, өченчедә исә Псков өлкәсе урнашты.

Аерым алганда, Татарстанның ирләр һәм хатын-кызлар командаларына эстафетада тиңнәр табылмады. Командалар составында нәкъ менә Идел буе физик культура, спорт һәм туризм академиясе студентлары чыгыш ясый. Сергей Лытнев, Ярослав Рыбочкин, Егор Казаринов һәм Сергей Ардашев чыгыш ясаган ирләр командасы 4 × 7,5 км арада пьедасталның иң югары баскычына менде. Ольга Кучерук, Мария Лихачева һәм Лали Кварацхелия исә 3х5 км га ярышып шулай ук барлык көндәшләреннән өстен чыкты.

Гомумән, «Ялта-Зәй» чаңгы базасында узган студентлар арасындагы ярышны Татарстан вәкилләре шактый уңышлы күрсәткечләр белән тәмамлады. Мәсәлән, Христина Мацокина спринт төрендә беренче урынга лаек булды, ә Ольга Кучерук өченче урынны яулады.