Алиш оныклары тәрбияләнүче бакча

1908 елның сентябрендә Куйбышев районы (хәзерге Спас) Көек авылында туган Абдулла Алиш татар әдәбиятында балалар дөньясын яктырткан, нәни дусларының күңеленә керерлек әсәрләр калдырган язучы-шагыйрь. Быел аның тууына 110 ел тулды. Шул уңайдан Казан шәһәрендәге “Тиенкәй” төрле төркемле 263нче балалар бакчасында әдәби-музыкаль кичә узды.

Биредә икенче ел рәттән Абдулла Алиш иҗатына багышланган “Изге исемең безнең йөрәкләрдә” проекты эшләп килә. Узган ел тәрбиячеләр балаларны Алишның автобиографиясе, иҗаты белән таныштырганнар, әти-әниләр белән берлектә балалар язучы әкиятләренә рәсемнәр ясаганнар.
Быел исә Алишның “Ил гизүчеләр белән хәйлә сөючеләр” дип аталган әкиятен мәктәпкә әзерлек төркеме балалары белән сәхнәләштерделәр. Бакчада тәрбияләнүчеләр Алишның шигырьләрен сөйләделәр. Әдәби кичә җыр-моңга үрелеп барды. Бәйрәмгә һәркем үз өлешен керткән: тәрбиячеләр төркемнәргә кереп Алишның әкиятләрен укыган, иҗаты белән таныштырганнар, әти-әниләр һәм балалар әкиятләренә рәсемнәр, кул эшләре ясаганнар.

– Логопед, музыка белгечләре, методист – берсе дә читтә калмады. Гомумән безнең коллективка һәммәсенә рәхмәтлемен, алар барысы да иҗади, тырыш кешеләр, – ди 22 ел балалар бакчасы системасында эшләүче татар теле укытучысы Зөһрә Бакирова. Бүгенге әдәби кичәнең төп оештыручысы ул – Зөһрә Мидхәт кызы. Җанын, бөтен күңелен биреп эшләүче тәрбияче, үз эшенең остасы.
– Эшемне бик яратам. Балаларны яратам. Аларда ничек тә булса туган телләренә карата мәхәббәт, гореф-гадәтләребезне уеннар, җыр-биюләр аша саклатасым килә, – ди ул.





Рәзинә ИСМӘГЫЙЛЕВА