Гена белән Чебурашканы акчага төшергәннәр

Россия Банкы Крокодил Гена һәм Чебурашка төшерелгән истәлекле тәңкәләр чыгарган. Көмеш тәңкәнең арткы ягында ике дус тимер юл вокзалы эскәмиясендә бер-берсенә карашып утыра. Мультфильм геройлары төсле дә әле! Тәңкәнең алгы ягында – Россия гербы. Әлеге тәңкәләр 7 мең тираж белән бастырылган. 3 сумлык кына булсалар да, коллекционерлар аларны күпкә кыйммәтрәк бәягә алырга әзер булыр, мөгаен. Геналы тәңкәләрнең көмештән эшләнгәне генә түгел, гадиләре дә бар. Алары – 25 сумлыклар. Төслеләре – 150 мең данә, буялмаганнары 850 мең данә чыгарылган. Димәк, Гена белән Чебурашка төшерелгән акчаның безнең кулларга да килеп җитү мөмкинлеге зур.