«Сабантуй» журналының гыйнвар саны

Тышлыкта – Теләче йолдызлары – «Раян» вокаль ансамбле. «Таныш булыйк!» сәхифәсендә «йолдызлар» үзләре турында фотокомикс аша «сөйли».

«Үзебезнеке» сәхифәсе укучыларны республикабызда җитештерелә торган продукцияләр белән танышырга чакыра. Чып-чын завод-фабрикаларда булып, әлеге әйберләрнең ничек әзерләнүе, ясалуы күрсәтеләчәк. Гыйнвар санында исә «Үзебезнеке» сәхифәсе белән татарча туңдырма ясау серләренә төшенергә мөмкин. Мәтрүшкәле, бөтнекле, җиләкле туңдырма кайда әзерләнә икән? «Сабантуй»дан укып белерсез!

Журналдагы тагын бер яңа сәхифә – «Милли бәйрәмнәр». Яңа ел көннәрен төрки халыклар яшәгән төбәкләрдә борынгыдан ук Нардуган вакыты дип йөрткәннәр. Гыйнвар санын укысагыз, Нардуганның тарихын, ничек бәйрәм ителүен белеп кенә калмассыз, Нардуган такмакларын да өйрәнерсез.

«Сәфәр Сәяхәтов», «Миңа ярдәм кирәк», «Экосәхифә», «Үземне өйрәнәм»... Бу – яңа сәхифәләрнең кайберләре генә. Моннан тыш, уеннар, балалар иҗаты, татар әдипләренең иҗат җимешләре – журналыбызның бизәге.

Әле журналда «Яраткан китапханәчем» дип исемләнгән яңа бәйге дә башланды. Бәйгегә килгән язмалар, шулай ук, «Сабантуй»да урын алачак.

Барлык укучыларны да, кызыклы язмалар укып, мавыктыргыч уеннар уйнап, файдалы видеолар карап, иҗат иленә сәяхәт итәргә чакырып калабыз!