Намаз

«Бисмилләһир-рахмәнир- рахим!» диеп кенә, 

Намазлыгын идәнгә 

Пөхтәләп җәеп кенә, 

Бабам укый намазны, 

Кәләпүш киеп кенә. 

Тып-тын калган өй эче: 

Сәгать тә келт-келт йөрми,

Самовар да гөрләми, 

Мәчебез дә мырламый,                                   

Радио да җырламый.

Ишегалды да тыныч:

Сыерлар мөгрәми,

Тавыклар кытакламый,

Үрдәкләр бакылдамый,

Казлар да каңгылдамый,

Хәтта Алабай өрми,

Бәрәннәр бәэлдәми —           

Намаз вакыты икәнне

Алар да белгәнмени?