Балалар өчен табигать турында шигырьләр

11 май – табигатьне ярату көне

Бу - кайвакыт ? Әйт, балам!

Ләбиб Лерон
Күз төпләрен угалап,
Кояш уянып килә...
«Кик-ри-күк! Торыгыз!» — дип,
Әтәч куанып көлә.
Кеше эшкә кузгала —
Бу — кайвакыт? Әйт, балам!
(Иртә)
Ак болытлар, кызарып,
Еракларга юл ала.
Биек таулар артына
Кояш кереп югала...
Көн сүрелә кай ара —
Бу — кайвакыт? Әйт, балам!
(Кич)
Сайрар кошлар «чут» та «чут»
Гөрләшә дә серләшә.
Агачларның яфраклары
Лепер-лепер сөйләшә...
Күктә кояш чайкала —
Бу — кайвакыт? Әйт, балам!
(Көндез)
Тәрәзәдән ай карый,
Йолдызлар җем-җем яна.
Акрын гына, талгын гына
Тынлык иңә дөньяга...
Кеше йокыга тала —
Бу — кайвакыт? Әйт, балам!
(Төн)
Фото: pixabay.com

Ташбака

Мәрзия Фәйзуллина
Ташбака кая барса да,
Төнлә, көндез, кич, иртә,
Үзенең таза таш йортын
Сыртына салып йөртә.
Берәр хәвеф-хәтәр күрсә,
Шул йорт эченә кача.
Тик куркыныч беткәч кенә
Ул таш ишеген ача.

Кояшлы уен

Эльмира Шәрифуллина
Яуды яңгыр, яуды яңгыр,
Күлләвекләр җыелды.
Чулт-чулт итеп агачлардан
Шук тамчылар коелды.
Шатлыгыннан кош сайрады,
Кояш чыкты ялтырап.
Ап-ак томан җиргә ятты
Иртә таңнан, ял сорап.
Әнә салават күпере —
Ал, кызыл басмалары,
Гүя ул нәни кызларның
Чәчүргеч тасмалары.
Уянды бөтен табигать,
Гөлләр нурга коенды.
Яңгыр үзе башлап китте
Бу кояшлы уенны.
Фото: pixabay.com

Август

Дамир Гарифуллин
Җиләкләр беткән чаклар,
Шомыртлар кипкән чаклар.
Бәрәңге үскән чаклар,
Алмалар пешкән чаклар.
Миләшләргә бүрек-бүрек
Кызыл ут капкан чаклар.
Арыш башакларын уып,
Куаныч тапкан чаклар.
Төрле-төрле эшләпәле
Гөмбәләр үскән чаклар.
Бөтен авыл белән бергә
Уракка төшкән чаклар.
Өем-өем помидорлар
Кызарып яткан чаклар.
Җир җимертеп болыннарда
Колыннар чапкан чаклар.
Белдеңме инде син, дус,
Менә нинди ул август!
Фото: pixabay.com