Җыр-көй, бию турында мәкальләр

29 апрель – Халыкара бию көне
Җыр-көй
* Белгәнгә җыр,
Белмәгәнгә "дыр".
* Әүвәл тавыш, аннан көй.
* Җилләтми томан ачылмый,
Җырламый күңел ачылмый.
* Җыр белгәнгә җыр һөнәр,
Җыр белү дә зур һөнәр.
* Җыр күңеллегә куаныч,
Күңелсезгә юаныч.
* Җырлаганның биергә исәбе бар.
* Җыр кешенең юлдашы.
* Җырлап ачылмаса күңел,
Елап ачылачак түгел.
* Җырлап эшләсәң, җырлап яшәрсең.
* Җырлый белмәгән кеше сызгырып йөри, ди.
* Җырны берәү шатлыктан, берәү кайгыдан җырлый.
* Җырның канаты бар.
* Җырның ертыгы юк.
* Җыр тыңламыйлар, моң тыңлыйлар.
* Заманасына күрә көе.
* Һәр заманның үз көе.
* Ил җыр белән яши.
* Илнең җыры бар,
Күңелнең моңы бар.
* Ишәк килде — җыр бетте.
* Көй — күңелнең моңы.
* Карга каңгылдап каз булмас.
* Карганыкы көн дә бер карылдау.
* Сандугач җырын җырлыйм дип, үз җырыңны онытма.
* Сандугач сайрап җиңәр, карга кычкырып җиңәр.
* Сандугач сайрый,
Карга кычкыра,
Бүре улый,
Кеше җырлый.
* Сүз — басу, җыр — чәчәк.
* Сүз — көмеш, җыр — алтын.
* Тел әйтә алмаганны җыр әйтер.
* Тукта, мин җырлыйм, миннән калса, син җырларсың.
* Һәр кешенең үз яраткан җыры бар.
* Һәр кошның үз моңы.
* Һәр кошның үз тавышы үзенә матур.
* Һәр кош үз тавышыннан тәм таба.
* Эч пошканга җыр файда.
* Эш вакытында такмак әйтмиләр.
* Ярма тарттырганда җырлый, ут сүнгәч бии.
Музыка һәм музыкантлар
* Анысы шулай шулаен да
Тартып җибәр кураең!
* Барабан каксалар, барабан артыннан;
Кубыз тартсалар, кубыз артыннан.
* Барабан таяк ала, барабанчы акча ала.
* Гармунсыз клуб,
Лампасыз куык.
* Гармунчы назлы булыр.
* Думбыра туй төшкән өйгә килешер.
* Думбырачы думбырачыны күрсә, кылы өзелә, ди.
* Музыканы хайваннар да яраталар.
* Ни думбыра белмәгән,
Ни сызгыра белмәгән.
* Эчең пошса, музыка уйна,
Уйный белмәсәң, уйнаганны тыңла!
Бию
* Атам-анам биегән,
Күңел ачкан биюдән.
* Уйнап-җырлап биемәгән — җебегән.
* Бии белгәнгә бер такта җитә, бии белмәгәнгә йөз такта да аз.
Иң мөһим һәм кызыклы язмаларны Татмедиа Telegram-каналында укыгыз
-
Дусларың белән дөрес аралашасыңмы? 9 июнь – Халыкара дуслар көне
-
Сабада «Серле каләм» бәйгесе узды Саба районында каләм чарлаучы иҗатчылар өчен оештырылган Татарстанның атказанган фән эшлеклесе Васил Гарифуллин исемендәге «Серле каләм» бәйгесесенең тантаналы бүләкләү чарасында «Сабантуй» журналы хезмәткәрләре дә катнашты.
-
Йөгергәндә нигә “кату керә”? Тиз атласак яки йөгерсәк, эчебез кадый башларга мөмкин. Моны “эчкә кату керү” дип тә әйтәләр. Ул нилектән була соң?