4000 тапкыр "отжимание" ясап Гиннес рекордлар китабына эләкмәгән... (ВИДЕО)

Биш яшьлек (!) Рәхим Куриев исемле чечен малае 2 сәгать 25 минут эчендә 4105 тапкыр (!) отжимание ясый. Әлеге вакыйганы видеога төшереп Гиннеслар рекордлар китабына җибәрләр, инде яшь спортчының исеме китапка да теркәлер дип өметләнәләр...
Тик рекордларны теркәүче абый-апаларыбыз Рәхимне мультфильм карарга башын борды, отжимание ясаганда астына такта тыкты дип бу рекордны рәсми рәвештә теркәүдән баш тарталар. Иң кызыгы һәм кызганычы шунда: хаталарсыз тагын бер тапкыр кабатларга тәкъдим итәләр! Рәхим Куриевның әлеге рекордын Чечня башлыгы Рамзан Кадыровка багышлавы да игътибарсыз кала. Хәер әле, Рамзан әфәнде социаль челтәрләрдә үз сүзен әйтмәде, гадәттә, аның мөрәҗәгатьләреннән соң кешеләр гаепләрен танып гафу үтенә башлыйлар. Бу очракта да бәлки яшь спортчыга карата уңай нәтиҗә ясалыр.