БАЛАЛАР БАКЧАСЫНА ӘЗЕРЛӘНӘБЕЗ! (Әти-әниләр өчен киңәшләр)


Балагызны бакчага урнаштырыр алдыннан аның өчен әлегә ят булган бу дөньяга әзерли башлау кирәк. Болай эшләгәндә ияләшү чоры аның өчен мөмкин кадәр җиңеләрәк узачак. Эшне нидәр башларга дисезме? Менә берничә киңәш:
– Балалар бакчасының көн тәртибенә әкренләп күнегү өчен, балагызның режимын да шуңа яраклаштырыгыз. Иртүк торырга өйрәтү, иртәнге аш, йокы сәгате – һәрберсенә алдан ияләшү мөһим.
– Сәламәтлекне һәм иммунитетны ныгыту өчен профилактик чаралар куллану да кирәк. Күп кенә балалар бакчага йөри башлагач, еш авырыйлар. Шуңа күрә балагызны чыныктыру, саф һавада озаграк булу җаен карагыз. Җиләк-җимеш, яшелчәләр табында һәрчак булсын.
– Балагыз боткалар, ашлар яратмаса, бакчада аңа бик авырга туры киләчәк. Шуңа күрә аны мондый төр ризыкларга ияләндерергә тырышыгыз.
– Сабыегыз сезнең ярдәмнән башка киенергә һәм чишенергә, әкият тыңламыйча гына йоклап китәргә өйрәнсен.
– Балалар бакчасы турында кызыклы итеп сөйләгез, аның анда барасы килсен.
– Балалар бакчасына урнашу ул әле бала өчен генә түгел, әти-әни өчен дә зур адым. Балага борчылуыгызны сиздермәгез. Әти-әнисенең куркуын сизгән бала, бакчага барырга ашкынып тормаячак.
– Баланы бакчада калдырып киткәндә күз яшьләрегезне күрсәтмәгез.
– Алып кайтырга соңга калып килмәгез. Башка балалар кайтып бетсә, аңа бик кыен булачак. Ул үзен кирәксез итеп тоярга, сезгә үпкәләргә мөмкин.
– Иртән бакчада калдырганда, хәзер килеп җитәм, дип китеп бару сабыегызда өмет уятачак. Болай эшләргә һич кенә дә ярамый. Балагыз сезнең эшкә киткәнегезне һәм аның артыннан кич белән генә киләчәгегезне белеп торырга тиеш.
– Кайбер ата-аналар бакчада бирелгән ризыкларны ашамаса да, кече йомышын киеменә башкарса да, баласын ачулана. Ияләшү чорында бу гадәти хәл. Бала өчен чит кешеләргә, ят бинага ияләшү бик кыен. Аны аңлап, мөмкин кадәр күбрәк җылыгызны, яратуыгызны күрсәтегез.
Балалар бакчасына ияләшү чоры һәрбер сабый өчен дә җиңел бирелсен иде. Әти-әниләргә һәм тәрбиячеләргә сабырлык телибез!
Илүсә ЗӘЙНЕТДИНОВА
Иң мөһим һәм кызыклы язмаларны Татмедиа Telegram-каналында укыгыз
-
Чаллыда кунакта Чаллы шәһәренең Мулланур Вахитов исемендәге 2 нче гимназиясенең уңышларын күзәтеп, андагы сәләтле укучылар белән танышырга күптән хыялланып йөри идек. Менә җай чыкты.
-
Әнкәм теле – туган телем «Балачак әдипләре» проекты кысаларында Йолдыз апа Шәрапова укучыларга бирем әзерләгән иде. Бик күп хатлар алдык. Кайбер эшләрне сезгә дә тәкъдим итәбез.
-
Күзгә яшьләр килде... Зур шатлыгым бар! Без, "Мирас" үрнәк балалар бию ансамбле, Санкт-Петербургта узган «Азимут» халыкара бәйгесендә җиңү яуладык!