Ильмира Нәгыймованың 4 яшьлек улы Камил: “Ну, җырларга кирәк, кешеләр бит мине көтә”

Җырчы Ильмира Нәгыймова белән Руслан Кирметдинов 4 яшьлек уллары Камилне дә үзләре белән гастрольләргә алып йөри башлады.

– Камилгә безнең белән йөрү бик ошый, – ди Ильмира. – Хәтта өйдә озаграк утырса, әбисен “концертка барасым килә” дип аптырата башлый. “Нишләп барасың килә соң?” – дигәч, “Ну җырларга кирәк кешеләргә. Алар бит көтәләр”, – дип җавап биргән. Рәхәтләнеп көлештек. Ул сәхнәгә чыккач, зал а җанланып китә. Бер дә каушамый, үзен бик иркен тота. Бии дә, җырлый да. Халык бик ярата үзен. Бүләкләр алып киләләр. Свердлов өлкәсеннән почта аша аның исеме язылган уенчыкларга кадәр җибәрделәр. Инстаграмда үзенең аккаунтын булдыргач, 7 мең кеше язылды. Руслан белән шаккатып утырабыз инде. Уку ягыннан да калышмый. Хәтере супер! Аның белән шөгыльләнгән кеше дә юк ләбаса. Бөтен әйберне телефоннан төрле мультфильмнар карап өйрәнде. Рус алфавитын белә, 100гә кадәр русча, 30га кадәр инглизчә саный. Саннарны да аера. Концерт вакытында да гел кәгазь битенә нидер язып утыра.