«Канатлы фәрештә»

Әниләр көне уңаеннан, яшь татарстанлыларны «Канатлы фәрештә» дип исемләнгән рәсем бәйгесендә катнашырга чакыралар.

27 ноябрь – Әниләр көнендә Россиянең күп кенә төбәкләре «Канатлы фәрештә» Бөтенроссия акциясенә кушылачак. Ана белән бала арасындагы мөнәсәбәтләргә җәмгыятьнең игътибарын җәлеп итү, күп балалы гаиләләрнең җәмгыятьтәге статусын күтәрү – әлеге акциянең төп максаты.

«Канатлы фәрештә» бәйгесенә эшләрне 1 октябрьгә кадәр юлларга була.  Балалар үзләренең сакчылары – фәрештәне ничек күз алдына китерүләрен рәсемдә тасвирларга тиеш. Фәрештәләр – мәхәббәт, игелек символы, яклау һәм коткару чагылышы, нәкъ менә әниләр кебек.  Бәйгедә теләсә кайсы бала катнаша ала. Моның өчен фәрештә рәсемен ясап, үз эшеңне фотога төшерергә, #КрыльяАнгела2020 хештегы белән социаль челтәрләрдә урнаштырырга һәм Россиянең күп балалы гаиләләре сайтында гариза тутырырга кирәк.

Конкурс нәтиҗәләре 10 октябрьдә ясалачак, ә катнашучыларның иң яхшы эшләре «Канатлы фәрештә» китап-альбомында басылачак. Моннан тыш, җиңүчеләр кыйммәтле бүләкләр белән бүләкләнәчәк һәм Россия Сәнгать Академиясенең гамәлдәге әгъзасы, РФ атказанган рәссамы Никас Сафроновтан исемле сертификатка да ия булачаклар.