Каникулларда поезд билетларын ярты бәягә алып булачак

Җәйгә ерак араларга йөри торган поездларга билетларны 50 процент ташлама белән алырга мөмкин. Бу акция 1 июньнән 31 августка кадәр дәвам итә. Билетларны бары тик 10-17 яшьлек балалар өчен алып була.

Ташлама бары тик Россия буйлап хәрәкәт итә торган плацкарт, гомуми вагоннарга, шулай ук «Скорый», «Пассажирский» категорияләрендәге, моторвагон составларының 2, 3 класслы вагоннарына кагыла.
Билетларны мондый төр ташлама белән сатып алганда, баланың туу турындагы таныклыгы яки паспорты кирәк була. Элегрәк ташламалы рәвештә поездларда йөрү 1 сентябрьдән 31 майга кадәр генә мөмкин.
1 июньнән 31 августка кадәр дәвам иткән акция былтыр да уздырылган. Ул вакытта аннан бөтен ил буенча 2,5 миллион бала кулланган.