Казанда Инклюзив белем бирү атнасы узачак

3–9 апрель көннәрендә «Инклюзив белем атнасы», «Барьерларсыз кино» кинофествиале кайтавазы» акциясе үтәчәк.

Мөмкинлекләре чикле балаларны мәктәп тормышына җәлеп итү, аларны тормышның төрле сфераларында башкалар белән бертигез дәрәҗәдә булуы, тиешле дәрәҗәдә ярдәм күрсәтү – боларның барысы да чараның төп бурычлары булып тора.

Бу көннәрдә мәктәпләрдә «Игелек дәресләре», сыйныф сәгатьләре, ижади бәйгеләр, укытучылар һәм әти–әниләр өчен тренинглар узачак. Әлеге чараларның һәрберсендә мөмкинлекләре чикле балалар башкалар белән бергә укый алулары турында сөйләнеләчәк.

Моннан тыш, «Мир» кинотеатрында «Барьерларсыз кино» Халыкара фестивале лауреатларының кинофильмнары күрсәтеләчәк. Аларда мөмкинлекләре чикле кешеләр, аларның уңышлы карьералары турында бәян ителә. Бу фильмнар мөмкинлекләре чикле кешеләрнең үзләрен лаеклы торымш белән яши алуларын күрсәтә.