«Сабантуй» журналының июнь саны чыкты

Җәй саны тышлыгында сезне Питрәч районы Ф.А.Сафин исемендәге Шәле гомуми белем бирү мәктәбендә укучы Нәрминә Бәйрәмова каршылый. Җырчы һәм биюче кыз турында фотокомикс күбрәк сөйләп бирер!

«Милли ашлар»да бу юлы белорус милли ризыгы – драниклар турында сөйләдек. Тәмле ризык белән видеоролик аша да танышырга мөмкин булачак.

Июнь аеның иң көтелгән көне нинди? Әлбәттә, милли бәйрәмебез – Сабан туе, дуслар! Сабантуйга багышланган өстәл уены 6-7 нче битләрдә көтә.

«Сабантуй»лы сәяхәттә республикабыз районнары белән таныштыруыбызны дәвам итәбез. Җәй санында Алабугага юл тоттык. Ә сез Алабугада «Шайтан каласы» барлыгын белә идегезме әле? Тулырак 10-11 нче битләрдә!

Без көн дә, нинди кием кияргә икән, дип баш ватабыз. Чираттагы «Әхлак дәресләре» сәхифәсендә киенү әдәбе хакында сөйләштек.

      Җәен ниләр эшләргә ярамый? Нәрсәдән читтә торырга кирәк? «Җәйге 12 ярамый» дигән язмада сезне 12 кагыйдә белән таныштырдык. Сез аларны истә калдырырга тиеш.

      Эссе көннәр күп булачак. Димәк, сезгә кызудан саклану чарасы кирәк. Оста куллы Зилә Әхмәтшина 20 нче биттә сезне веер – җилпәзә әзерләргә өйрәтер. Ә аннары рәхәтләнеп «Күңелле тәнәфес»тәге җәйге биремнәрне эшләрсез.

     «Батыр Мырауҗан» турындагы кызыклы хикәя белән балачак әдибе Лилия Фәрхетдинова таныштырыр. 

«Мәшһүр ватандашлар»да исә бөек рус шагыйре һәм язучысы Александр Пушкин турында кызыклы мәгълүмат әзерләдек. Язучы үзе турында видеороликта да сөйли. Кереп карагыз!

 «Сабантуй» белән каникулларны кызыклы һәм рәхәт үткәрик!