Интернет кагыйдәләрен беләсеңме?

Балаларның 82 проценты социаль челтәрләрдә таныш булмаган кешеләрдән дуслашырга чакыру ала, 30 проценты кибербуллинг белән очраша. Һәр җиденче баланы исә онлайн-алдакчылар "кәкре каенга терәтеп калдыра". Бу хәлләрне булдырмас өчен балаларга Интернетта үз-үзеңне тоту кагыйдәләрен ныклап өйрәтергә кирәк, ди белгечләр. Шуңа да Россиядә "Цифрлы аңлату" ("Цифровой ликбез") проекты булдырылган. Ул укучыларга Интернетта үз-үзеңне тоту кагыйдәләрен, киберһөҗүмнәргә ничек җавап бирергә кирәклеген һәм башка төр алдауларга ышанмый калу серләрен төшендерәчәк. Проект материаллары белән https://digital-likbez.datalesson.ru ресурсында танышырга мөмкин.