Логотип Журнал Сабантуй
Бер фикер

Башкалар кебек буласым килә

«Мин 5 нче сыйныфта укыйм. Сыйныфыбызда бердәнбер отличник! Әти-әнием өй эшләремне гел тикшереп, «Укы!» – дип торалар. Сыйныфташлар телефонда уйнаганда, мин дәрес әзерлим. Дәресләрдән соң түгәрәкләр дә бар әле. Кайчак берни дә эшләмичә, телефонда гына утырасы килә. Ни өчен сыйныфташларым шулай эшли ала, ә мин, әти-әниемне тыңлап, укыйм да укыйм?! Минем дә башкалар кебек буласым килә!»

Люция Закирҗанова, психолог:
Сәлам, дустым! Сорау туган икән, димәк, син хәзерге халәтеңнән канәгать түгел. Үзеңнең яхшы укуың белән бер дә горурланмыйсың шикелле. Әйдә, берничә сорауга ихлас җавап биреп карыйк әле!
1.Синең буш вакытың бармы? Игътибар! «Буш вакыт» – түгәрәкләр вакыты да, төшке яки кичке аш вакыты да ТҮГЕЛ! Бу – ни теләсәң, шуны эшли ала торган вакыт. Ни кызганыч, кайбер әти-әниләр түгәрәкләрдә һәм репетиторлар белән шөгылләнүне дә буш вакытка кертә. Нәтиҗәдә, дуслар белән аралашырга, уйнарга, әби-бабайларга кунакка барырга өлгермисең дә. Йә булмаса, дусларың белән төнлә юрган астында язышып ятасың. Бу дөрес түгел! Йокы безгә энергия туплау, көн буе җыйган мәгълүматны эшкәртү, ягъни укыган дәресләрне истә калдыру өчен кирәк. Ә үзең теләгәнне эшләргә вакыт калмый икән, шатлыкны кайдан җыярга соң?
Син үз вакытыңны үзең дөрес планлаштыра ала торган яшьтә. Әти-әниең белән киңәшләшеп, мәктәп, дәрес әзерләү, өйдә булышу, ашау, йокы һәм, әлбәттә, буш вакыт та кергән көнлек план төзегез.
2. Сыйныфташларың сиңа карата нинди мөнәсәбәттә? Алар сине кызыклы, белемле кеше дип саныймы? Синең яшьтә дуслар булу бик мөһим. Бәлки, сыйныфташларың белән сөйләшергә уртак темалар, кызыксынулар булмау синдә ялгызлык хисе уятадыр? Мин башкалардан аерылып торам, шуңа күрә яхшы укыйсым да килми, дип уйлыйсыңдыр?
Шулай булса, сыйныф җитәкчегез яки әти-әниләрнең ярдәме кирәк булачак. Сыйныфыгыз белән бергәләп төрле остаханәләргә барыгыз. Бу һәркайсыгызның сәләтен ачарга, берләшергә ярдәм итәр. Ә менә укуда бераз артта калучы сыйныфташларыңа үзең дә ярдәм итә аласың!
3. «Отличник» дип, укытучылар, әти-әниең сиңа артык зур таләпләр куймыймы? Мәсәлән, «Отличник башың белән дәрес әзерләми килдеңме?», йә булмаса, «Олимпиадага кем бара?» – «Әлбәттә, отличник!» Яхшы укучы исемен йөртү бик авыр, сыйныфта бердәнбер булсаң, тагын да авыррак. Бар яктан да алдынгы булу бик күп энергия таләп итә. «Нишләргә соң?» – диярсең. Кайвакыт идеаль булмаска! Мәсәлән, яхшы укымасаң, нишләр идең – шул турыда хыялланып кара. Хыяллану – шуны эшләү дигән сүз түгел бит әле! Ә менә шул хыялларың сиңа нәрсә җитмәвен күрсәтер.
Әйтик, мәктәпкә бөтенләй барып тормас идем, дип хыялландың, ди. Ә бу вакытта нәрсә белән шөгылләнер идең? Урамда йөрер яки телевизор карар идем, дип җавап бирүең бар. Димәк, синең гадәти көннәрдә моны эшләргә вакытың калмый. Тизрәк беренче сорауга әйләнеп кайт һәм вакытыңны дөрес планлаштырырга өйрән! Уңышлар сиңа, дустым!

Следите за самым важным и интересным в Telegram-каналеТатмедиа

Нет комментариев