Кайсы балагызны күбрәк яратасыз?

Менә шундый уңайсыз сорау бирергә булдым әле сезгә. Мондый сүзләр өчен тиргәргә дә, коры гына: “Барысын да тигез күрәм”, - дияргә дә ашыкмагыз. Гаиләдә берничә бала икән, әти-әни аларның берсен барыбер өстенрәк күрә, дип ышандыра психологлар. Бары тик бу хакта һәркем әйтеп кенә бетерми.

Халыкара тикшеренүләр күрсәткәнчә, әти-әниләрнең яртысыннан артыгы төпчек баланы күбрәк ярата. Сораштыруда катнашучыларның 25 проценты, киресенчә, өлкәнен өстенрәк күрүен әйткән. Уртанчылар – иң аз тавыш җыючылар. Аларны әти-әниләрнең 18 проценты гына аеруча ярата. Кызлар, малайлар белән чагыштырганда, әти-әниләрнең мәхәббәтен күбрәк яулый икән.

Менә шундый хәлләр. Чынлыкта, кайсыдыр баланы ныграк яратуы турында бер генә әти-әни дә ачыктан-ачык әйтмәячәк. Беренчедән, кеше ни уйлар?! Икенчедән, бала үзен әллә ни яратмауларын ишетсә, аңа да бик авыр булачак. Ләкин әти-әнинең бер баланы артыграк яратуы гайре табигый хәл түгел, монда гаеп юк, ди белгечләр. Янәсе, бу – безнең каныбызда.

Ишеткәнегез бардыр, имеш, бер анадан: “Кайсы балаңны күбрәк яратасың”, - дип сораганнар. “Авыру баламны – терелгәнче, чыгып киткәнен – өйгә кайтып кергәнче, кечкенә баламны – үсеп җиткәнче! Барысын да – үзем үлгәнче!” – дип җавап биргән ул.

Миңа калса, без балаларыбызны, чыннан да, бертөрле яратмыйбыз. Әти-әни өчен һәр бала үзенчә якын һәм үзенчә кадерле!

Ә сез балаларыгызны ничек яратасыз?