Яктылык таратучы карт турында әкият

Шулай итеп, кабат җиләкле җәйләр килгән. Көннәрдән беркөнне карт урман аланында ниндидер тавышлар ишеткән һәм шунда таба ашыккан. Ни күрсен, чыршы янында бер-берсенә сыенып, ике кечкенә кыз бала утыра ди. Яннарында буш тырыслар тора, ә үзләре елыйлар икән. Карт, җайлап сораша торгач, балаларның әниләрен шатландырырга теләп җиләккә китүләрен, кызганычка каршы, урманда адашуларын белгән. Балалар бу вакытта җиләк өлгермәгәнен белмәгәннәр шул.

Карт балаларны бик кызганган. Алар янына шүрәлеләр, җәнлекләр җыелышкан. Балалар, аларны күреп, тагын да катырак елый башлаганнар ди. Җан ияләре барысы да аларга ярдәм итәргә теләгәннәр. Иң өлкән шүрәле, картны һәм балаларны урман читенә кадәр озатырга ризалашкан.

Шактый бара торгач, урман бетеп, кыр башланган. Еракта авыл өйләре күренгән. Балалар, үз авылларын танып, бик шатланганнар. Карт белән шүрәлене кунакка чакырганнар. Шүрәле, бу авылда күптәнге танышы Былтыр яшәгәнен искә төшереп, чакыруны әдәпле генә кире каккан. Карт, балалар бик ялынып чакыргач, ризалашкан.

Балаларны югалттык дип, кайгыга баткан әти-әниләре, исән-сау балаларны күреп, шатлыктан нишләргә дә белмәгәннәр. Алар картны бик кадерләп кунак иткәннәр.

Бу көнне авылда зур бәйрәм булган. Картны да шунда алып киткәннәр. Искиткеч бәйрәм булган бу. Нинди генә уеннар уйнамаганнар! Капчык белән көч сынашу, йомыркалы кашыкны авызга кабып йөгерү, күзне бәйләп чүлмәк вату дисеңме! Картка бу бәйрәм бик ошаган, үзе дә уеннарда катнашкан әле.

Авыл кешеләре бу бәйрәмнең Сабантуй дип аталуы, язгы кыр эшләре беткәч, бергәләп, рәхәтләнеп бәйрәм итүләре турында сөйләгәннәр.

Бәйрәм беткәч шатланышып өйгә кайткан балалар әти-әниләре белән картны үз яннарында калырга бик кыстаганнар. Әлбәттә, каласы килгән аның, тик урман киекләре-дуслары турында да уйлаган. Барысы белән саубуллашып, кунак итүләре өчен рәхмәт әйтеп, авылга килеп йөрергә вәгъдә биреп, урманына юнәлгән.

Шулай еллар үткән, нәни кызлар да үсеп җиткәннәр. Мәктәпне тәмамлап, калага укырга киткәннәр. Тик үзләрен коткарган изге күңелле картны онытмаганнар алар. Урманга барып, хәлләрен белеп йөргәннәр. Карт үзе дә кунакка килгәләгән.

Чираттагы җәйге каникулларына кайткач, кызлар, гадәттәгечә урманга юнәлгәннәр. Тик... картны тапмаганнар алар.  Алар янына өлкән шүрәле килгән һәм кызларга картның кешеләргә юл күрсәтүче иң якты йолдызга әйләнүе турында сөйләгән. Ул кызларга каен тузыннан ясалган бер китап тапшырган. Кызлар, дулкынланып, аны кулга алганнар.

Иң беренче битенә зур итеп, Сабантуй дип язылган ясалма китапта карт нәни җәнлекләр өчен язган әкият, шигырь, хикәят, уеннарны җыеп барган. Шунда ук алар ясаган рәсемнәрне дә җыйган ди. Кызлар бу кадерле бүләккә бик шатланганнар. Калага баргач, бу китапны гәҗит-журналлар чыгаручы укытучыларына да күрсәткәннәр ди. Алар, бергәләшеп, китап белән танышканнар һәм бу игелекле эшне дәвам итәргә дигән фикергә килгәннәр. Шул көннән башлап, балалар өчен «Сабантуй» журналы нәшер ителә башлаган.

Карт, якты йолдыз булып, бүген дә адашканнарга юл күрсәтә, яктылык тарата ди.

Зеленодол районы С.К. Гыйматдинов исемендәге

Осиново гимназиясенең 3А сыйныф укучылары