1 сентябрь – Белем бәйрәме.

Бүген мин йокыдан

Таң белән уяндым.

Беренче тордым дип,

Әй, шундый куандым.

Карасам, көткәндәй

Кадерле кунагын,

Әнием пешереп

Өлгергән коймагын!

Кояш та елмая,

Гөлем дә, энем дә…

Ә үзем шатлыктан

Җырлыйм да, биим дә.

Бүген бит зур бәйрәм —

Беренче сентябрь!

Хуш, әни! Мин киттем —

Мәктәбем көтәдер.

Дүртлеләр, бишлеләр

Көтәдер үземне…

Ә, энем, син инде

Бер елга түз инде.

Хәкимҗан Халиков