Роботны үзең яса!

Уенчык кибетләрендә робот ясау өчен конструкторлар сатыла. Мондый робот рычаглар, гайкалар һәм редукторлардан тора, аның клеммалары, платалары, электродвигательләре була. Шуларны җыясың да, пульт белән идарә итәсең. Җыю озак түгел, күрсәтмәдә барысы да аңлаешлы язылган. Эретеп ябыштыручы аппарат (паяльник) кирәкми, механизмнар гайкалар ярдәмендә ныгытыла.

Гадәттә конструкторда батарея комплектта булмый. Ярашлы батареяны өстәмә сатып алырга онытма.

Әмма иң кызыгы – роботны үзең ясау.
Моның өчен батареялар, конструктор, детальләр һәм микроконтроллер (роботның “баш мие”) кирәк. Ләкин детальләрне сатып алырга ашыкма. Башта роботлар төзергә өйрәтүче курсларга йөреп алу хәерле булыр.

Физиканы һәм математиканы белмичә, яхшы робот ясау мөмкин түгел. Шәһәр мәктәпләрендә робот ясарга техник түгәрәкләрдә өйрәнеп була. Казанда, мәсәлән, Иннополис университетының STEM-үзәгендә робот ясыйлар.