«Сабантуй» журналының июль саны!

«Сабантуй» журналының июль тышлыгын харизмалы, шук Әмирхан Мөбарәкшин бизи. Ул Казанның 83 нче лицеенда укый, 7 яшьтән Казан балалар филармониясендә шөгыльләнә. Өстәвенә, үзлегеннән синтезатор һәм электрогитарада уйнарга өйрәнгән.

Милли бизәкле кием заманча була аламы? Ничек кенә әле! Без шундый киемнәр тегү цехын Биектауда күреп кайттык. Илүзә Гәрәева, үзенең тегү цехы белән таныштырып, «Үзебезнеке» сәхифәсе өчен милли бизәкле футболка тегү сере белән бүлеште. Әлеге процессны видеоформатта да карый аласыз.

«Уен сәгате» бу санда тагын да күңелле килеп чыкты! Без укучыларыбызга берсеннән-берсе кызыклы биремнәр, күбәләкләр буенча холыкны ачыклаучы тест та уйлап таптык. Шулай ук дуслар белән уйнар өчен, менә дигән өстәл уены да әзерләдек. Тизрәк журналны кулга алырга гына кирәк!

Татарстанның кайсы шәһәрләрендә булганыгыз бар? «Сабантуй»лы сәяхәткә чакырабыз. Июль санында сез Чистай шәһәре белән якыннанрак таныша алачаксыз. Шулай ук шәһәр белән тулырак һәм тизрәк танышырга кыска видео ярдәм итәчәк.

Брест шәһәре кайда урнашкан? Бөек Ватан сугышында Брест кирмәнен саклаучыларга күпме һөҗүм кичерергә туры килгән? Ә ничә мең кеше немец

әсирлегенә эләккән? Болар турында «Герой-шәһәр» сәхифәсе битләре сөйләр.

Бу сәхифә тарихи буягыч белән дә тулыландырылды.

Дуслар, ә сез дөрес тукланасызмы? Зыянлы ризыкларга өстенлек бирмисезме? «Үземне өйрәнәм» сәхифәсендә ашкайнату системасын өйрәндек. Республика балалар клиник хастаханәсенең балалар табибы Илнара Сәхипгәрәева балаларга киңәшләрен биреп узды.

Иҗади битләрне дә онытмыйбыз. «Сабантуй»ның «Балачак әдипләре» битләрен язучы Камил абый Кәримов әсәренә багышладык.

Шәп яңалыгыбыз да бар! «Сабантуй» журналының балалар редколлегиясе кызыксынучан малайлар һәм кызлар өчен кастинг игълан итә. Аның шартлары белән журналның арткы битләрендә танышырга мөмкин.

Тагын бик күп мавыктыргыч битләр сезне «Сабантуй»ның июль санында көтә. Тизрәк аны алып укырга җитешегез!