Кызу сукса нишләргә?

Ниһаять, җәй! Бу атнада ул календарьда гына түгел, табигатьтә дә чагыла. Көндез һава 30-32 градуска кадәр кыза. Синоптиклар, якын арада шундый температура сакланачак, дип вәгъдә итә. Мондый көннәрдә су коенасы, кояшта кызынасы килә. Ләкин бер нәрсәне истән чыгарырга ярамый: җәй көне кояш астында озак йөрсәң, кызу сугуы ихтимал. Кеше хәтта аңын югалтырга да мөмкин. Бу очракта кичекмәстән «ашыгыч ярдәм» чакыртырга кирәк. Ә ул килгәнче зыян күрүчегә менә ничек булышырга була:

1. Зыян күргән кешене күләгәле, яхшы җилләтелә торган урынга алып кереп яткырыгыз.

2. Җылы киемнәрен салдырыгыз. Аяк астына мендәр яки валик кыстырыгыз.

3. Маңгаена юеш чүпрәк куегыз. Әз-әзләп кенә чиста яки тозлы су каптырып торыгыз.

Мондый хәлгә калмас өчен, эсседә озак йөрергә ярамавын, җиңел баш киеме кияргә кирәклеген онытмагыз!