Равил Фәйзуллин шигырьләре

Татарстанның халык шагыйре, РСФСРның атказанган сәнгать эшлеклесе, Габдулла Тукай исемендәге Татарстан дәүләт премиясе лауреаты,  Муса Җәлил исемендәге премия иясе Равил Фәйзуллинның 4 августта туган көне.

Очты, очты...

Очты, очты, каргалар очты!

Башта кара каргалар очты!

Аннан ала каргалар очты!

Аннан бала каргалар очты!

Артларыннан табалар очты!

Табада борчаклар бар иде!

Шундый эре борчаклар иде!

 Шундый тәмле борчаклар иде!г

Борчакны күргәч, каргалар

канатланырлар инде!

Әй шатланырлар инде!

Болытлар да, кырын ятып,

 ашап ятарлар инде...

Шундый тәмле борчаклар иде!

Торналарны да табынга чакырсалар ярар иде!..

Сөт

Сөтне сыер бирә икән,

Әни шулай дип әйтә,

Үзе иртүк бидон тотып

Кибеткә ыгып китә.

Көн дә – көн дә барып йөрү

Кыендыр бит әнигә;

Кибеттән алып сыерны

Өйдә саумый соң нигә?

Безнең ил

Карталарда безнең илне

Буяганнар алсуга.

Чөнки кояш иртүк торып,

Алсу утлы шардай булып,

Иң башта бездә чыга.

Балыкта

Кармак, җимнәр алдык та

иртүк киттек балыкка.

Бу кызыл суалчаннарга,

бу ак чебен кортына –

без тиешбез ким дигәндә

ярты чиләк тотырга!

Әйтик –

бишләп сыла,

ике-өч чуртан,

җиде бәртәс, бер җәен...

Корбан белән чабак балык

сансыз кабар, тәгаен!

Бу җепләр дә ярамаса,

бу кармак та тотмаса!

Кайтканда иңең салыныр,

байлыгың баса-баса.

Тизрәк Ыкка!

Таллыкка!

...Инде кайтып киләбез.

Шырык-шырык көләбез.

Ни өченме көләбез?

Без үзебез беләбез...

Булатка алты чиртте.

Соңгысында чыгарды...

иләмсез зур бер галош!

Ничек җебе чыдады!

Миңа чиртте зур балык,

тик... булмады чыгарып!...

Кармак калды җәеннең

мыегына уралып!

Рим ярда күп чуалды.

Төрле урынга салды.

Берсендә чыгарды... минем

Кармаклы суалчанны!

Безнең уртак юаныч –

Азат тоткан бер маймыч.

Ята чиләк төбендә,

ун грамм бар кимендә!

...Бүген юл бик уңмады.

Тота идек тотуын –

урыны җай булмады.

Без утырган тугайлыкта

җиле уңай булмады...

Иртәгә тотарга калды

бүгенгесе өчен дә.

Әйтик,

унлап сыла,

алты чуртан,

утдүрт бәртәс...