18 декабрь 2023 яңалыклары

Балалар өчен татар телендә «Саф» радио эшли башлаганга да ел ярымнан артык вакыт узып китте. Бу вакыт аралыгында интернет киңлекләрендә татар телендә балалар өчен эшләүче бердәнбер радионың 27 меңнән артык үз уникаль тыңлаучысы барлыкка килде. Аны интернетта «Саф радио» сайтында тыңларга мөмкин. Радиода тәүлек буена балалар өчен татарча җырлар, татар классик музыкасы, шигырьләр, әкиятләр, әдәби әсәрләр, татарча радиоспектакльләр һәм кызыклы тапшырулар яңгырый.