Каникул озайтылды

Көннәр артык салкын булу сәбәпле, Татарстанның күп кенә мәктәпләрендә каникулларны ике көнгә озайттылар. Дөрес, моның өчен укучыларга яз көне әзрәк ял итәргә туры киләчәк.

Республиканың Мәгариф һәм фән министрлыгы белдерүенчә, һава температурасы салкын булганда мәктәпкә бармаска рөхсәт ителә. –23 градуста авыл мәктәпләренең 1-4 сыйныф укучылары, ә 25 градустан түбәнрәк булганда, 5-9 сыйныфлар укымый.

Шәһәр мәктәпләрендә башлангыч сыйныфлар 25 градус салкында укырга бармый. Ә 5-9 сыйныф укучыларына тыныч күңел белән өйдә калу өчен 27 градус салкын булуы шарт.