ХӘЕРЛЕ ЮЛ: Җәй, җәяүле һәм скутер

Скутер яхшы бүләкме?

Соңгы елларда җәйләрен скутер һәм мопедларда җилдергән балалар саны күзгә күренеп арта. Әмма балаларга ясаган әлеге бүләк, кызганычка каршы, аяныч нәтиҗәләргә дә китерергә мөмкин.
– Баласына скутер бүләк итеп, күп кенә әти-әниләр моның җитди нәтиҗәләргә китерү ихтималы хакында уйланмый, – дип борчылу белдерә Татарстанның ЮХИДИ идарәсе хезмәткәрләре. – Ике тәгәрмәчле әлеге транспорт чаралары, тотрыксыз булуыннан тыш, иминлек ягыннан да калыша. Скутерда теләсә-нинди егылу һәм бәрелү дә зур куркыныч тудыра.
Сүз уңаеннан: скутер (мопед) белән 16 яшьтән соң гына идарә итәргә ярый. Ләкин аның өчен (двигатель күләме 50 куб сантиметрдан артмаган очракта) “М” категорияле йөртү таныклыгы кирәк.
– Йөртүчегә 16 яшь юк икән, административ җәза әти-әнисенә карата кулланылачак. Ә инде 16 яшь тулып та, йөртү таныклыгы юк икән, скутерда йөрүчегә 5 меңнән алып 15 мең сумга кадәр штраф салына. Транспорт чарасы да махсус урынга озатыла, – дип ачыклык керттеләр ЮХИДИ идарәсеннән.

Җәяүле, белеп тор!

– Балалар катнашындагы юл-транспорт һәлакәтләренә ясалган анализ нәтиҗәсе: һәлакәттә зыян күргән балаларның яртысыннан артыгы – җәяүлеләр. Татарстанда быелның беренче 4 аенда җәяүле балалар катнашында 72 һәлакәт теркәлгән, 73 бала имгәнгән. Балалар катнашындагы һәлакәтнең 55 проценты җәяүлеләр белән бәйле булган.
– 10 яше тулмаган баланың юлда ялгызы гына булуы гадәттән тыш хәлгә тиң! Янәшәсендә юл кагыйдәсен төгәл үтәгән өлкән кеше булганда гына балага куркыныч янамый.
– Олы кешеләр бер караштан мәгълүматны кабул итеп алса, балага моның өчен ике тапкыр күбрәк вакыт кирәк. Фәнни тикшеренүләр 12 яшькә кадәр баланың күзәтү дәрәҗәсе тар булуын исбатлаган.