Ташлар җыюдан башланган хезмәт

Франциядә урнашкан әлеге замокны Фердинанд Шеваль замкы дип атап йөртәләр. Аны шулай ук идеаль замок дип тә атыйлар. Әлеге корылма нәрсәсе белән игътибарга лаек соң? Замоклар җирдә бик күп бит. Әмма монысының аерым үзенчәлеге бар шул. Замокны төзүче Фердинанд Шеваль ташчы да. Архитектор да булмаган. Ул почтальон хезмәтен үтәгән. Чыганаклардан күренгәнчә, ул бервакыт сәер формалы ташка абынып егыла һәм әлеге ташны өенә алып кайта (безнең вакыт булса күпләр билгесез юнәлештә тотып ыргаткан булырлар иде). Бу хәл 1879 елда була.

Моннан соң Фердинанд төрле формадагы ташлар җыя башлый. Почтальон буларак аңа көн саен 30 км. Тирәсе юл үтәргә туры килә. Бу юл элек диңгез астында булганга анда ташлар бихисап булган. Шеваль ташлар җыюын 33 ел дәвам итә. Башта кесәләренә тутырып алып кайтса соңрак кәрзин, аннары көпчәкле арбага күчә. Шул ук вакытта үзенең төп хезмәтен дә башкара.

Җыелган ташлардан, 20 ел дәвамында замокның тышкы стеналарын төзи. Лаеклы ялга чыккач Шеваль архитектура осталыгын үзлегеннән өйрәнеп замокны тулаем төзеп бетерүгә тотына. Аның хыялы чынга аша да, әлбәттә үз тырышлыгы белән.

Әлеге замокта ул төрле халыкларның архитектур стилләрен, мотивларын чагылдыра, монда диннәр дә очрашып матур бизәкләр хасил итәләр. Бер генә стена да гади генә түгел, бар җирдә бизәкләр...

Замокның биеклеге 10, озынлыгы 26, киңлеге 14 метр һәм күз алдыгызга китерегез, бу бер кеше хезмәте белән башкарылган!..

Фердинанд Шеваль 1924 елның 19 августында, 88 яшьтә, замогын салып бетереп 1 ел үткәч вафат була. 1969 елда әлеге замок Франциянең милли мирасы дип игълан ителә.

zs3
zs4