"Татарча диктант"та катнашучылар Еникиның "Җиз кыңгырау" әсәреннән өзек язачак

29 октябрьдә татар теленнән белемне тикшерү өчен «Татарча диктант» Казан, Мәскәү, Петербург, Ижевск, Уфа, Екатеринбург, Төмән, шулай ук Казахстан (Павлодар), Кыргызстанда (Бишкәк) узачак.

Акция Татарстанның барлык шәһәрләрендә, Россия шәһәрләрендә, Казахстанда һәм Кыргызстанда бер үк вакытта 11 сәгатьтә башлана. Катнашучылар Әмирхан Еникиның "Җиз кыңгырау" әсәреннән өзек язачак. Аларның грамоталыгын филологлар, профессорлар һәм филология фәннәре докторлары тикшерәчәк. Диктант текстын атказанган сәнгать һәм мәдәният эшлеклеләре, язучылар һәм алып баручылар укыячак.

Казанда «Татарча диктант» Казан федераль университетының Лев Толстой исемендәге Филология һәм мәдәниятара комммуникацияләр институтында узачак. Диктант текстын Татарстанның атказанган артисты, Г.Камал исемендәге Татар дәүләт академия театр актеры Фәнис Җиһаншин укыячак.

Чыганак: http://tatar-inform.tatar