Басу патшасы

Кирәкле сыйфатлар: хезмәт сөючәнлек, җаваплылык, күзәтүчәнлек, игътибарлылык, оперпативлык, оештыру сәләте.

Уңай яклары: агроном – ул оста бакчачы. Эшендә алган белемнәрне үз хуҗалыгында да куллана ала: төрле сортлы яшелчә, җиләк-җимеш үстерә, җирне дөрес итеп эшкәртә. Бу һөнәр ияләре һәрвакыт ачык һавада, шәһәрдән читтә эшли. Монысы исә сәламәтлек өчен файдалы.

Тискәре яклары: агрономга бик күп эшләргә туры килә. Аеруча чәчү һәм урып-җыю вакытында. Ләкин еш кына уңыш белгечнең тырышлыгыннан гына тормый, һава шартларына да нык бәйле. Ә басуга кертелүче ашламалар, кыр тузаны агрономның сәламәтлеген какшатырга мөмкин. 

Нишләргә кирәк? Агроном булырга теләгән кеше, беренче чиратта, табигатьне яратырга тиеш. Әйләнә-тирә дөнья, биология фәннәрен тырышып укырга, кызыксынучан һәм күзәтүчән булырга, бу өлкәдә белемнәрне арттырып торырга кирәк.