Уңыш сере

Люция Ибәтуллина, психолог:

Теләгәнебезгә ирешү өчен адымнар ясый башлагач кына, башта йөрткән хыялыбыз максатка әверелә. Максатлар кыска вакытлы (көн, атна), урта вакытлы (ярты ел, берничә ай, 1 ел) һәм озак вакытлы (3, 5, 10 ел) була. 

Ярты юлда тукталып калмас өчен, сиңа «Тотрыклылык тәгәрмәче» техникасы ярдәмгә килер. 

Моның өчен:

*Бирелгән таблицаны тутыр. Тормышыңның һәр өлкәсе янына 3–4 гамәл язып чык. Бу гамәлләр синең өчен еллык максат булачак. 

*Календарь алып, әлеге гамәлләрне айларга бүлеп чык. Аена 2 гамәлдән дә артык язма (мәсәлән: гыйнвар – теш табибына бару, дуслар белән очрашу).

*Календарьда үзең өчен мөһим бәйрәмнәрне билгеләргә онытма. Шул рәвешле син истәлекле көннәргә алдан әзерләнә алачаксың. 

*Айга 1–2 генә гамәл булуына борчылма. Без вакытның 60 процентын гына планлаштыра алабыз, калган 40 проценты исә очраклы вакыйгалардан тора. 

*Календарьны гаиләң белән бергә тутыр. Биремнәрне ашыкмыйча  үтәргә тырыш. 

Таблица һәм календарьны тутыргач, эш өстәле каршына элеп куярга онытма!