Милли кием: азәрбайҗан костюмы

Азәрбайҗан хатын-кызлары киеме җилкәле һәм биллегә аерылган. Җилкәле киемнәр – күлмәк (көйнек), кафтан (архалык) яки җиңсез бишмәт. Шулай ук озын күлмәкләр кигәннәр. Алар дон дип аталган. Билле киемнәр – чалбар (шалвар) һәм итәк (туман) кергән.

Азәрбайҗаннар костюмнары төрле тукымаларны бергә кушып тегелүе белән дә үзенчәлекле. Миткаль (хумайин агы), кумач (гумаш), ситса (чит), йон (шал) – әлеге  материаллар киң кулланыла.

Хәлле катлау кешеләре киемнәрне кыйммәтле парча, ефәк, тирмә һәм бәрхеттән тектергән. Тирмә – бизәкләп эшләнгән йон тукыма. Аны Көньяк Азәрбайҗан һәм Төньяк-Көнбатыш Иранда җитештергәннәр.

Барлык костюмнар да чигү белән бизәлгән. Шуңа да гади генә киемнәр дә матур һәм затлы күренгән.